Хилийн чанадад амьдарч байгаа иргэдээ Иргэний бүртгэлийн ерөнхий газраас энэ сарын 20-ноос зургадугаар сарын 30-ны хооронд бүртгэхээр боллоо. Тэднийг иргэний шинэчилсэн бүртгэлд бүрэн хамруулах зорилготой энэ ажлыг гадаад орнуудад суугаа Монголын дипломат төлөөлөгчийн газруудтай хамтран хэрэгжүүлэх юм.

16-аас дээш насны иргэн оршин суугаа улсдаа байгаа Дипломат төлөөлөгчийн газарт биечлэн очиж иргэний бүртгэл хариуцсан ажилтанд бүртгүүлнэ. 16- аас доош насны хүүхдүүдийг эх эцэг, асран хамгаалагч нь төрсний гэрчилгээг нь авч очиж бүртгүүлэх учиртай. Ингэхдээ үндэсний гадаад паспорт, иргэний үнэмлэх, хүүхдүүдийнхээ төрсний гэрчилгээг авч очно.

Ингэснээр гадаадад суугаа монголчууд “Хүний хөгжил сан”-гаас хишиг хувь хүртэх, “Эрдэнэс Тавантолгой” ХК-ийн хувьцаа эзэмших боломж бүрдэнэ. Учир нь УИХ-ын 2010 оны 39, Засгийн газрын 350 дугаар тогтоолоор ”Эрдэнэс Тавантолгой” ХК-ийн хувьцааг иргэний шинэчилсэн бүртгэлд хамрагдсан иргэдэд нэрийн данс нээж эзэмшүүлэхээр заасан билээ.

www.mongolnews.mn - Эх нутгийн чимээ