Хувь, хувьсгалын ажлаа гялалзуулж яваа урлагийн бүсгүйчүүдийн тэргүүн эгнээнд поп дива Алтанцэцэг зүй ёсоор орох биз. Хамгийн чадалтай хоолойтой хэмээгддэг дуучин бүсгүй Монголд ховор тоног төхөөрөмж бүхий мэргэжлийн студийн зэрэгцээ дэлгүүр ажиллуулдаг болсныг бид мэднэ.

Бизнест хөл тавьсан хэдий ч бусдын адил урлагаасаа нүүр буруулаагүй тэрээр тун саяхан буюу энэ сарын 24-ний өдөр хүүхдийн сургалт хүмүүжлийн тусгай төвийн 100 гаруй хүүхдэд гарын бэлэг гардуулан, бяцхан хэмжээний тоглолтоор бэлэг барьжээ.

Харамсалтай нь тэр өдрийнхөө үдэш дуучин бүсгүй болон түүний найзууд бичиг баримт, эд зүйлээ хулгайд алджээ. Бид энэ талаар дуучин Ж.Алтанцэцэгээс тодрууллаа.

-Сайн байна уу. Таныг их хэмжээний эд зүйлээ хулгайд алдан Сүхбаатар дүүргийн цагдаад хандсан  гэж сонслоо. Юу болсон юм?
-Энэ сарын 24-ний өглөө би өөрийн хэдэн найзын хамт Амгалан дахь хүүхдийн сургалт хүмүүжлийн тусгай төв дээр очин 120 гаруй хүүхдэд бэлэг гардуулсан юм. Урьд нь дөрвөн жилийн өмнө би энэ газарт Тайваны олон улсын байгууллагын төлөөлөгчидтэй хамт очиж байсан л даа. Тэр үетэй харьцуулахад хүүхдүүдийн ерөнхий байдал, өмсөж зүүсэн нь илт сайжирсан нь мэдэгдэж байсан. Халамж, үйлчилгээ нь сайн явагддаг юм билээ. Тус төвийн хүүхдүүд бидэнд дуулж бүжиглэн авьяасаа үзүүлж, тарьсан цэцэг, тэжээж буй амьтдаа харуулаад л ер нь их сайхан сэтгэлд ойр, халуун дулаан уур амьсгалтай арга хэмжээ болж өнгөрсөн л дөө.

Тэгээд найзуудынхаа хамт "Сайхан арга хэмжээ боллоо" гээд хоолонд орцгоочихоод Улаанбаатар их дэлгүүр лүү орсон юм. Дэлгүүр хаахаас өмнө найз бүсгүйнхээ авчирсан шинэ барааг харах гээд жаахан яарч байсан л даа. 20 цаг болж байсан. Ороод 30 минут орчим л болсон байх, гараад иртэл тийм хэрэг болсон байсан.

-Таны машин байсан уу. Ямар хэмжээний эд зүйл алдагдсан юм?
-Найзын маань машин байсан. Би эрээн булган шуба зэрэг бага сага зүйлээ алдсан. Нэг найз маань урагшаа явах гээд бичиг баримтаа 3000 ам.доллар, 5000 юаньтай хамт авч явсан юм. Түүнийгээ болон булган малгай, шинээр авсан хоёр гутал гээд нэлээн юм байсныгаа алдсан. Хамгийн гол нь бичиг баримт байна. Ид хөдөлгөөнтэй, ачаалал ихтэй байгаа үед 30 минут хүрэхгүйн хугацаанд ийм зүйл болно гэж үнэхээр бодоогүй л дээ. Дэлгүүрийн яг үүдэн дээр ид хүн хөлхөж байгаа үе шүү дээ.

Хүмүүст сэрэмжлүүлэг болгон хэлэхэд гаршсан хулгайчид машиныг дохиоллоор нь түгжих үед аль нэг хаалгыг нь дутуу хааж орхих зэргээр маш нарийн аргатай болсон байдаг юм байна. Тэгээд Сүхбаатар дүүргийн цагдаад хандсан. Тэр хавьд байсан хүмүүсийн яриагаар боровтор өнгийн хувцастай эрэгтэй эмэгтэй хоёр хүн байсан дуулдсан.

-Цагдаагийнхан ямар нэг хариу өгөв үү?
-Одоогийн байдлаар үгүй байна