УИХ-ын
тухай хуульд нэмэлт, өөрчлөлт оруулах төслийг Э.Бат-Үүл санаачилжээ.
Зарим гишүүн камер харахаараа улс төрийн популизм хийж, шоудаад байхаар
нь хэсэг нөхрийн хамт Дэгийн тухай хуульд нэмэлт, өөрчлөлт оруулж,
Байнгын хороог хаалттай болгож үзсэн.
Гэвч тэр нь хэвлэл, олон нийтийнхний эсэргүүцэлтэй тулгаран цуцлагдсан билээ. “Гишүүд нь шоу хийсний төлөө хэвлэлийн эрх чөлөө, ард түмний мэдээлэл олж авах эрхэд халдах ёсгүй” гэсэн шүүмжлэлийг Байнгын хороог хаасан 20-иод хоногт төсөл санаачлагчид хангалттай сонссон. Тэгвэл дэггүй, шоучин гишүүддээ хариуцлага тооцохоор Э.Бат- Үүл шийдэж, хууль санаачлах эрхээ эдлэв бололтой. Үе үеийн УИХ-ын гишүүдэд хана хэрэм болж, бүрэн эрхийг нь бүрэн утгаар нь эдлүүлж байсан нэгэн заалтыг дээрх төсөлдөө тэрбээр илүү тодотгож өгчээ.
Энэ бол “УИХ-ын гишүүн чуулганы танхимд хэлсэн үгэндээ хариуцлага хүлээхгүй” гэсэн заалт. Ам халаад ирэхээрээ түшээд нэгнийхээ буруу булхайг зоволтгүй дуудаж, элдвээр хэлдэг. Гэхдээ өнөөх заалтынхаа хүчээр ямар ч хариуцлага хүлээхгүй.
Одоо харин энэ эрх нь хязгаарлагдаж мэдэхээр болжээ. Өнгөрсөн баасан гаригийн чуулганаар УИХ-ын тухай хуульд нэмэлт, өөрчлөлт оруулах төслийг хэлэлцлээ. “УИХ-ын гишүүн чуулганы танхимд үг хэлэхдээ төрийн эсрэг гэмт хэрэгт уриалан дуудахыг хориглоно” хэмээн “дархан” заалтыг тодотгож өгчээ. “Засгийн газар огцор, огцруулна, авч хаяна, ална, хядна” гэх мэтээр дураар “бурах” боломж гишүүдэд үгүй болох нь. Хэрэв хуучных шигээ санаад сандал, суудал тойрсон тэмцэлд санааны зоргоор уриалаатахвал шууд л “дээлээ нөмөрнө”.
Уг хуулийн төсөлтэй холбогдуулан Эрүүгийн хуульд ч нэмэлт, өөрчлөлт оруулж буй юм байна. Тэгэхээр уг төсөлд тусгаснаар ам алдаж, төрийн эсрэг гэмт хэрэгт уриалсан гишүүн Эрүүгийн хуулийн дагуу 17-20 хүртэлх жилийн ял сонсож мэдэхээр болох аж. Чуулганаар асуудлыг хэлэлцэх үеэр Ц.Шинэбаяр, Д.Тэрбишдагва, Б.БатЭрдэнэ, Н.Ганбямба нарын гишүүн “Гишүүдийн үгнээс өө хайж, дарамтлан эрхийг нь хязгаарлах заалт байна” хэмээн эсэргүүцэв.
“Ардчилал өөрийгөө хамгаалж чаддаг байх ёстой” хэмээн төсөл санаачлагч тайлбарлаж буй юм билээ. “Яг ийм далбаан дор л улс төрийн томоохон хэлмэгдүүлэлт өрнөдөг юм шүү дээ” хэмээн зарим гишүүн илт дургүйцэж байгаа аж.
Гэхдээ өөрсөддөө дэг хэрэгтэй гэж үзсэн тул төслийг хэлэлцэхийг олонх дэмжсэн. Үг хэлэх, чөлөөтэй ярих эрхээ хамгаалахын тулд УИХ-ын зарим гишүүн ажил хаяж, туг барин жагсаж мэдэхээр болжээ. Хязгааргүй бүрэн эрх эдлэхийн тулд тэр шүү дээ.
Э.Бат-Үүл гишүүн хэвлэлийнхний амыг барих гээд чадаагүй тул ангийн нөхдийнхөө эрхэнд “халдахаар” шийдэв бололтой.
