Дэлхийн боксын лигийн зургадугаар тойргийн тоглолтууд өнгөрсөн амралтын өдрүүдэд явагдлаа. Өмнө нь манай ширэн бээлийтнүүдээс У.Мөнх-Эрдэнэ, З.Энхзориг нар рингэнд гарсан ч хараахан ялалт авч чадаагүй байсан. Тэгвэл бямба гаригт Азербайжаны “Baku Fires” багийн нэр дээр тоглож буй гавьяат тамирчин Н.Төгсцогт манай боксчдын ялалтын салхийг хагалжээ. Тэрбээр “Beijing Dragons” багийн Хи Живейг оноогоор (50:45, 47:48, 48:47) ялж, багтаа тус хүргэсэн байна.
Улмаар баг нь энэ уулзалтад хятадуудыг гэрт нь 3:2-оор хожжээ. Азербайжаны багийн хувьд тус лигт 100 хувийн амжилттай яваа (6-0) цорын ганц баг юм. Түүнчлэн энэ тойрогт ОУХМ З.Энхзориг хоёр дахь тоглолтоо “Paris United”-ийн Р.Аззединегийн эсрэг хийж, оноогоор ялагдлаа. Түүний “Milan Thunder” баг гол өрсөлдөгчдөө 4:1-ээр дийлдэж, хоёр дахь хожигдлоо амссан байна.
