Монголчуудын уламжлалт баяр “Цагаан сар” дөхсөн энэ үед урд зүгийг зорих наймаачдын цуваа ихсэж, жижиг худалдаачдын орлогыг нэмэгдүүлж байгаа тухай Хятадын үндэсний томоохон хэвлэл болох “Global Times”-д бахдан бичсэн мэдээг товчлон хүргэе.
“Цагаан сараа элбэг, дэлбэг хийх гэсэн монголчууд баярын бэлтгэлээ базаахаар Бээжин, Эрээн хотыг зорих нь ихэслээ. Өнгөрсөн долоо хоногт л гэхэд 2500 наймаачин ирсэн байв. 32 настай жижиг худалдаачин Лин Зонтонгийн хэлж буйгаар нэгдүгээр сар гарснаас хойш түүний лангуугаар өдөрт дунджаар 50 монгол ирж, элдэв бараа худалдан авдаг бөгөөд тэр ч үүнд зориулж уртасгасан цагаар ажиллаж байгаа гэнэ.
“Торго болон хямдхан хувцас тэд ихээр худалдан авдаг. Тэдний ихэнх нь хятадаар чөлөөтэй ойлголцдог бөгөөд заримтай нь л тооны машинаар харилцдаг” гэж тэр хэлжээ.
36 настай бизнесмэн Зан Жинвү өнгөрсөн жил Монголоор бизнес аялал хийхдээ монгол наймаачид 100 юаниар авсан цамцаа 800 юань (129 доллар) хүргэж зардгийг олж мэдсэн тухайгаа ярьсан.
Бээжингийн гүний гаалийн ажилтны хэлж буйгаар монголчууд шашны зүйлс, хуурамч үнэт эдлэл, жимс, хүнсний ногоо, хямд хувцас ихээр авч байгаа аж.
Жилийн энэ үед манай жижиг худалдаачдын орлого эрс дээшилдэг” гэж нийтлэлд өгүүлжээ.
