Нийслэлд
өнгөрсөн бямба гаригаас нөөцийн мах худалдаанд гаргасан. Нийслэлийн
хороо бүрт хоёр дэлгүүрт худалдахаар болсон ч мах зарж буй дэлгүүр цөөн
байв. “Бөмбөгөр”, “Миркури” худалдааны төв, “Миний дэлгүүр”-ийн сүлжээ
дэлгүүрээр ороход нөөцийн мах хайсан хүмүүс олон таарав. Энэ талаар
Монголын махны холбооны гүйцэтгэх захирал М.Лхачинбалаас тодрууллаа.
-Дэлгүүрүүдээр нөөцийн мах бараг зарахгүй байна лээ. Энэ ямар учиртай юм бэ?
-Нийслэлийн 132 хорооны 264 цэгт нөөцийн мах худалдахаар болсон. Ихэнх дэлгүүрээр мах зараагүй байгаа байх. Учир нь дэлгүүрүүдтэй гэрээ хийх, олон цэгт хүргэх гээд ажил их байна шүү дээ. Энэ долоо хоногт нийлүүлэлт жигдэрнэ.
-Нөөцийн махыг туранхай, амт муутай байна гэж зарим иргэн ярьж байсан. Хэчнээн компани, хаанаас махаа бэлтгэв. Махны чанарт танай холбооноос хэрхэн хяналт тавьсан бэ?
-“Мах импекс”, “Жаст агро”, “Тайж трейд” зэрэг 14 компани мах бэлтгэж нийлүүлсэн. Тэд орон нутгийн салбар компаниараа дамжуулан бэлтгэсэн байх. Нөөцийн махыг зах зээлийн үнээс харьцангуй доогуур худалдаалж байгаа. Үхрийн мах 3500, хониных 3000, ямааныхыг 2400 төгрөгөөр борлуулж буй нь боломжийн үнэ. Цагаан сар болох гэж буй учраас үхэр, ямааны махыг худалдаанд гаргасан. Иргэд нөөцийн махыг туранхай, амтгүй байна гэж ярьдаг. Хүн бүрийн санаанд нийцүүлнэ гэдэг хэцүү. Чанар чансаа нь таалагдахгүй бол өөр сонголт байгаа шүү дээ.
-Нөөцийн махыг хэдийн хугацаанд худалдаанд гаргах вэ. Нийлүүлэлт хүрэлцээтэй юу?
-Нийслэлийн хэмжээнд 14 мянган тонн мах нөөцөлсөн. Бид Улаанбаатар хотын Захирагчийн ажлын албаныхантай ярилцаж ирэх зургадугаар сар хүртэл худалдах шийдвэр гаргалаа. Нөөцийн махыг нийт 267 цэгээр дамжуулан 0.5 болон 1-3 килограммаар жижиглэн савлаж борлуулана.
