УИХ-д 25-аас дээш настай хүн нэр дэвшиж, сонгогдох эрхтэй. Энэ л зарчмаар насанд хүрсэн эрхмүүдийг сонгогчид төлөөлөгчөөрөө илгээдэг.
Гэтэл үнэндээ тэд насанд хүрсэн хүн шиг ажиллаж чаддаггүй гэнэ. Хэрүүл хийж, нэгнээ элдвээр дуудан, наргиан хөгжөөн болно. Баталж байгаа хууль нь ч гэсэн цоорхойгоор дүүрэн, яг л муу сурдаг жаалын сурлагын дэвтэр мэт.
Гэхдээ Ч.Сайханбилэг нарын санаагаар бол гишүүдийг ийм болгож хувиргасан буруутан нь хэвлэлийнхэн, телевизийн камер юм байна. Камер харахаараа л гишүүдийн хүүхэд зан сэргэж, сонгогч олондоо хайр нь хүрээд явчихна.
Бүр ямар асуудал ярьж буйгаа умартах хүртлээ сэтгэлийн хөөрөлд ордог байна. Юу ярьж байгааг нь иргэд анхаарахаас өөрийг нь сонирхохгүй гэдгийг бол мартаж орхино. Харин Байнгын хороог хааж, камерууд үгүй болсон хойно том хүн шиг ажил ярих юм байх. УИХ-ын чуулганы пүрэв гаригийн хуралдааны үеэр камерийн өмнө ийм болчихдогоо цөөнгүй гишүүн илчлэв.
“Тэгээд л ард түмэн биднийг телевизээр харчихаад цэцэрлэгийн хүүхэд шиг” гээд байгаа юм гэцгээлээ. Харин насанд хүрэх “дөхөж яваа” зарим нь “Та нар чинь ухаантай л юм бол камерийн өмнө үгээ цэнэх хэрэгтэй биз дээ” гэв.
Бүр ядаад гаднаасаа л том болохоос дотроо хүүхэд болчихсон тэдний эргэлзээг УИХ-ын дарга нь тайлж “Та нар чинь том болсон хүмүүс. Ард түмний төлөөлөл, за” хэмээн сануулав.
