Өнгөрсөн онд манай улсад гахайн ханиад гарснаас хэд хэдэн хүн нас барж, хурдацтай тархсан билээ. Харин энэ сарын 13-наас уг ханиад дахин дэгдэж эхэлсэн байна.
Энэ талаар Халдварт өвчин судлалын үндэсний төвийн Сургалт сурталчилгаа хариуцсан албаны дарга Ч.Уртнасангаас тодруулахад
“Хүйтний улирал эхэлсэнтэй холбоотой томуугийн өвчлөл ихсэж байна. Энэ сарын 13-нд нийслэлийн Сонгинохайрхан дүүрэгт томуугийн А хүрээний /H1N1/ цар тахлын халдвар илэрсэн.
Одоогийн байдлаар 0-2 насны гурван хүүхэд өвчлөөд байгаа. Энэ ханиад хүнээс хүнд, амьсгалын болон ахуйн замаар халдварладаг учир иргэд дархлаагаа сайжруулах хэрэгтэй.
Халуурах, нус гоожих, ханиалгах, цээж, толгой, хоолой, булчин өвдөх, амьсгаадах, сульдах, зэрэг шинж тэмдэг илэрнэ.
Тиймээс бид гахайн ханиаднаас урьдчилан сэргийлэхийн тулд өрхийн эмнэлгээр 65 хүртэлх насны хүмүүст үнэгүй вакцин хийж байгаа” гэв.
