Тэмээн хүзүү-Бага Улаан даваа чиглэлд 110.8 км авто зам тавих ажлыг 2011 онд эхэлнэ. Уг замын 65 хувийг нь Азийн хөгжлийн банкны буцалтгүй тусламжаар, үлдсэнийг нь Засгийн газраас санхүүжүүлэн, 2013 онд ашиглалтад оруулахаар Зам, тээвэр, барилга, хот байгуулалтын яам, гүйцэтгэгчээр шалгарсан БНХАУ-ын “China Jiangsu Jianda Construction Co.Inc” компанитай гэрээ байгуулав.

Энэ нь “Баруун бүсийн босоо тэнхлэгийн авто зам хөгжүүлэх төсөл”-ийн хүрээнд Ярант-Ховд-Өлгий-Улаанбай шинт хооронд тавьж буй (Азийн авто замын сүлжээний АН-4 чиглэл) 748.4 км авто замын нэг хэсэг юм. Ярант-Ховд-ӨлгийУлаанбайшинтын замыг улсын төсөв болон БНХАУ-ын хөнгөлөлттэй зээл, Азийн хөгжлийн банкны буцалтгүй тусламжаар барьж байна.

НҮБ-ын Ази, Номхон далайн бүсийн эдийн засаг, нийгмийн комиссын 2004 оны ээлжит чуулганаар олон улсын худалдаа, аялал жуулчлалын хэлхээ холбоог бэхжүүлэх, үр ашигтай тээвэрлэлтийг хөгжүүлэх зорилгоор байгуулсан “Азийн авто замын сүлжээний тухай Засгийн газар хоорондын хэлэлцээр”-т Монгол Улсын Засгийн газар нэгдэн орсон. Тус хэлэлцээрийн хүрээнд манай улс Азийн авто замын сүлжээний АН-3, АН-4, АН-32 чиглэлд оролцож байгаа.

Дээрх зам ашиглалтад орсноор манай улсын баруун бүс нутгийн нийгэм, эдийн засаг эрчимтэй хөгжих төдийгүй хөрш зэргэлдээ улсуудын зорчигч, ачаа барааг хамгийн дөт замаар дамжин өнгөрүүлэх боломж бүрдэж, бүс нутгийн хэмжээнд үр ашигтай, аюулгүй авто замтай болно гэж ЗТБХБЯ-ны мэргэжилтнүүд үзэж байна.

www.mongolnews.mn - Эх нутгийн чимээ