УИХ- ын гишүүн Д.Ганхуяг, С.Эрдэнэ, Ц.Шинэбаяр нар Ашигт малтмалын тухай хууль, тогтоомжийн зарим заалтын хэрэгжилтийн талаар Ерөнхий сайд С.Батболдод асуулга тавилаа. Засгийн газраас УИХ-д өргөн барьсан Тавантолгойн ордыг ашиглах талаарх танилцуулгад 500 орчим сая. тонн нүүрсний нөөцтэй Ухаа худагийн талбайг орхисон аж. Тэд үүнийг хоёр жилийн өмнө Засгийн газрын шийдвэрийн дагуу “Энержи ресурс” ХХК-тай байгуулсан Ашигт малтмалын тусгай зөвшөөрөл шилжүүлэх тухай гэрээтэй холбон үзжээ.

Энэхүү гэрээгээр Ухаа худаг-11952А тусгай зөвшөөрөл бүхий 2962 га талбайг “Энержи ресурс” ХХК-д үлдээхээр тохирсон юм байна. Засгийн газрын энэ шийдвэр Ашигт малтмалын тухай хуулийн 60.4-ийн “Улсын төсвийн хөрөнгөөр хайгуул хийж, нөөцийг нь тогтоон улсын нэгдсэн бүртгэлд бүртгэсэн ордод хайгуулын тусгай зөвшөөрөл олгохгүй”, 26.9-ийн “Улсын төсвийн хөрөнгөөр хайгуул хийж нөөцийг нь тогтоосон талбайд ашиглалтын тусгай зөвшөөрлийг сонгон шалгаруулалтын журмаар олгоно”, 9.1.5-ын Засгийн газар “Стратегийн ач холбогдол бүхий ашигт малтмалын ордын төрийн эзэмшлийн хувь, хэмжээг тогтоох тухай саналыг УИХ-д өргөн мэдүүлэх” гэсэн заалтыг зөрчсөн гэнэ.

Энэ бүхэнд тайлбар өгөхийг гишүүд Ерөнхий сайдаас хүсжээ. Ухаа худагийн нэг хэсгийг “Энержи ресурс” ХХК-д олгохдоо УИХ-ын шийдвэрээр биш Засгийн газрын тогтоолоор шийдсэн гэнэ. Мөн энэхүү ордоос иргэн бүрт хувьцаа эзэмшүүлэх ажил юу болж буй, нэг хүнд хэчнээн хувьцаа ногдох талаар тодорхой мэдээлэл өгөхийг хүссэн аж.

www.mongolnews.mn - Эх нутгийн чимээ