Их Британийн “The Economist” сэтгүүл “Дэлхийн улс орнуудын 2010 оны ардчиллын индекс”-ийг зарлалаа. Монгол Улс 2006 онд уг индексийн 56, 2008 онд 58 дугаарт жагсаж байсан ч 2010 онд манай ардчиллын гол үзүүлэлтүүд буурсны улмаас зургаан байр ухарч 64 дүгээрт оржээ.
Ардчиллын төвшний бүх үзүүлэлтээр Норвеги тэргүүлж, Исланд, Дани, Швед, Шинэ Зеланд улсууд “айргийн” тавд “давхисан” бол БНАСАУ хамгийн сүүлийн байрыг эзэлж, “баян ходоодоор” шалгарчээ. Ардчиллын индекс нь улс орнуудын ардчиллын төвшнийг илтгэдэг бөгөөд ту хайн улсын нийгмийн санаа бодолд тулгуурлан гаргасан хөндлөнгийн шинжээчдийн дүг нэлтэд үндэслэдэг юм байна. Ардчиллын индексийг хоёр жил тутамд зарладаг бөгөөд сонгуулийн үйл явц, Засгийн газрын үйл ажиллагаа, улс төрийн оролцоо, улс төрийн соёл, иргэний эрх чөлөө гэсэн таван гол үзүүлэлтийг харгалзан үздэг аж.
Дэлхийн улс орнуудын ардчиллын 2010 оны индекст нийт 167 орон хамрагдсан бөгөөд тэдгээрийг төрийн дэглэмээр нь бүрэн төгс ардчилалтай, хагас ардчилалтай, гибрид дэглэмтэй, авторитар дэглэмтэй хэмээн дөрвөн бүлэгт хуваажээ. Бүрэн ардчилалтай 26, хагас ардчилалтай 53, гибрид дэглэмтэй 33, авторитар дэглэмтэй 55 улс нэрлэгдсэн байна. Манай хойд хөрш ОХУ гибрид дэглэмтэй орны бүлэгт багтаж байгаа бөгөөд жагсаалтын 107-д бичигдсэн бол, өмнөд их гүрэн БНХАУ авторитар дэглэмтэйд тооцогдож, 136 дугаар байрыг эзэлжээ.
АНУ бүрэн ардчилалтайд тооцогдож буй ч Чехийн араас жагсаалтын 17 дугаарт бичигдсэн байна. “The Economist” сэтгүүл дэлхийн улс орнуудын ардчиллын индексийг 2006 оноос эхлэн зарласан бөгөөд энэ удаагийнх гурав дахь нь юм.
