“Оросын төмөр зам” олон улсын зах зээлд бонд арилжаалж эдүгээ “амташжээ”. Өнгөрсөн хавар тус компани 1.5 тэрбум долларын өрийн бичиг гаргасан бол ирэх онд 300-600 сая доллар ийм замаар босгохоор зэхэж буйг РБК агентлаг мэдээлэв.
Энэ удаа Европын болон Азийн зах зээлийг онилж буйгаа “Оросын төмөр зам” компанийн тэргүүн В.И. Якунин тэмдэглэсэн байна. Өмнө нь Ирландын хөрөнгийн биржид бонд гаргаж босгосон 1.5 тэрбум долларынхаа өрийг оросууд 2017 оны дөрөвдүгээр сард барагдуулах ёстой бөгөөд жилийн 5.74 орчим хувийн хүү төлөх юм. “Оросын төмөр зам” мөн дотооддоо 100 тэрбум рублийн бонд гаргах эрхтэй боловч өнөөдрийн байдлаар ердөө 15 тэрбум рубль босгожээ.
Ирэх онд нэмж рублийн өрийн бичиг арилжаалж магадгүйг тус компанийн дэд ерөнхийлөгч Вадим Морозов онцолсон байна. Ойрын таван жилд “Оросын төмөр зам”-ын хөрөнгө оруулалтын хөтөлбөр 710 тэрбум рублийн дутагдалд орохоор байгааг В.И.Якунин анхааруулж байсан удаатай. Үүнээс болж тус компани сүүлийн үед их хэмжээний өрийн бичиг гаргах болжээ.
