“Том болоорой Удвал” нэртэйгээр энэ жилээс эхэлсэн үндэсний “Өгөх өдөр” бяцхан монгол охинд урт наслах боломж хайрлалаа. Монголд Эх нялхасын эрдэм шинжилгээний төв, Ионсей эмнэлэг, АНУ-аас ирсэн алдартай эмч нар булчингийн хатингаршил гэх удамшлын өвчин гэж оношилсон Удвал охин Солонгос улсад ирээд булчингийн хийгээд удамшлийн ямар ч өвчингүй болох нь тогтоогдлоо. Уржигдархан 2 нас хүрсэн Удвал охины эцэг эх Монголд байхдаа очоогүй мундаг лам хуварга, бөө зайран байдаггүй. Тэдний хэлсэнээр охин энэ жилийн цагаан сараас хэтрэхгүйгээр тэнгэрийн улсад очно гэж байсан ч сайхан сэтгэлт монголчуудынхаа тусламж, хандиваар Солонгос улсад ирээд өвчний онош нь булчингийн хатингаршил, удамшлын өвчин биш болох нь бүрэн тогтоогдлоо. Охин Солонгос улсад байхдаа төрсөн өдрөө ээж аавынхаа хамт өнгөрөөсөн. Түүнийг эрүүл болгох нь эцэг эхийнх нь хувьд хамгийн том бэлэг болно гэж бодож сууна. Удвал охин 2 настай ч 7 сартай 2 ихэр дүүтэй. Солонгост ирээд эмчилгээнд хамрагдаад бие нь сайжраад ирэхээр 2 ихрээ ихэд санаж байгаа бөгөөд зургийг нь хараад тэврээд “эвий эвий” гэж үнсээд унтдаг байна. Охин ээж аавтайгаа өнгөрсөн 11 сарын 6-ны өдөр БНСУ-д шинжилгээ хийлгэхээр ирсэн. Таних хүн байхгүй, шөнө 01 цагт тус улсад ирээд Монголчууд их байдгаар нь Дүндэмүний “Монгол таун” бараадаж, тэр хавьдаа 50 мянган вонноор буудаллажээ. Удвал охин өнөөдөр ээж аавынхаа хамт сарын 100 мянган вонны түрээстэй “Цагаачдын сүмийн” харьяа 2 өрөө байрны нэг өрөөг хөлслөн амьдарч байна. Удвал охин 11 сарын 10-д Солонгостоо 2-т ордог “Ионсей  Северенс” эмнэлэгт 3 сая 600 мянга |4 сая 200 мянган төгрөг| вонны өртөгтэй 16 төрлийн  шинжилгээ хийлгэжээ. Шинжилгээний хариу 14 хоног дотор гарч  Монголд оношлоод удахгүй  амийг нь авч явна гэж байсан булчингийн хатингаршил гэдэг өвчин огт биш болох нь 100 хувь тогтоогджээ. Харин охины тархи агшсан бөгөөд түүнээсээ болж өсөлт нь удаашралтай байгаа удамшлын бус олдмол өвчин мөн гэдгийг “Ионсей Северенс”  эмнэлэгээс тогтоожээ. Ингэж эцэг эх, хандив өргөсөн монголчуудын шантралгүй зүтгэл охиныг 100 хувь эдгэх боломжтой гэсэн сайхан хариулт сонсоход хүргэжээ. Өвчнөөсөө болж шаналан байнга уйлагнадаг Удвал охин шинжилгээний дараа өгсөн тархины эмээ ууснаас хойш уйлахаа больсон. Харин ч сахилгагүйтэж, тоглоом тоглох, ээжийнхээ заасан дууг цээжилж байна. Өмнө нь юм заагаад байхад ойлгохгүй, өөдөөс гиншигнээд байдаг байсан нь больсон гэж Удвалын ээж Мянгаа хэлж байв. Харин одоо бие засахдаа горшонкоо зааж, ус асгавал алчуур нэхэж, гараа заваартуулсан бол өөрөө арчиж, хэлсэн бүхнийг ойлгоод Монголд байдгаасаа тэс өөр болсон гэж ээж аав нь баярлаж байсан. Удвалын 2 ихэр дүү ээжийнх нь ээж дээр Увс аймагт амьдарч байна. Хөдөө талд эрүүл саруул сайхан өсөж байгаа гэнэ. Мөөмөө санаж уйлагнахгүй, эмээгийнхээ өгсөн хоолыг сайн идээд ханиндаа сайн байгаа гэж Удвалын эмээ утсаар ярьжээ. Одоо Удвал охины ээж, аав 2 том охиноо булчингийн хатингаршил гэх удамшлын эдгэшгүй өвчин тусаагүй гэдгийг мэдсэн учраас охиноо бүрэн эмчлүүлээд Солонгос нутгаас явахаар зорьж байна. Тэр болгон хүссэн үедээ энэ нутагт ирээд байж чадахгүй юм чинь охины эрүүл болгоод буцна гэж хүсэж байна. Харин охиныг “Ионсей Северэнс” эмнэлэг 100 хувь эмчилж чадна гэж хэлсэн ч охины эмчигээний төлбөр 20 сая орчим вонн болно. Тиймээс Солонгос улсын иргэн, батлан даагч байх ёстой гэж шаарджээ. Монгол цөөхөн хүн таньдаг Удвалын ээж аавын хувьд үл хөдлөх хөрөнгөтэй, хадгаламжийн данстай, Сөүл хотод амьдардаг Солонгос иргэн олж охиныхоо эмчилгээнд батлан даагч болгоно гэдэг үнэхээр хэцүү асуудал болоод байна. Хэрвээ 20 сая вонн бэлэн байх юм бол батлан даагчийн шаардлаггүйгээр эмчилгээндээ ороход бэлэн байна. Одоо Удвалын аав ээжийн гар дээр 10 сая төгрөг буюу 8 сая гаруй вонн л бэлэн байгаа юм байна. Монголд байхад үзсэн эмч бүр, Монголд оношлон эмчлэх ямар ч боломжгүй гэж уйлаад өвдөх бүрт нь анальгин, димдрол тарьж байсан нь энд ирээд эмчилгээ хийхэд нэлээд саад болсон байна. Охины зүрхийг тайвшруулж, анальгин димдролын хордлогыг тайлах гэж багагүй хоног хордлого тайлах эмчилгээ хийжээ. Тэр байтугай хүмүүсийн дунд хамгийн сайн гэж яригддаг үзмэрч бөө зайран нар Удвалын ээжийн энэ насандаа хийсэн үйлийн үр охиноор чинь гарч байна. Тайван явуул гэж байсан ч удаатай юм байна. Солонгост ирээд эрүүл мэндийн салбар хэрхэн хөгжиж болдог, энгийн иргэд ч хүртэл эрх тэгш үйлчлүүлдэг гэдгийг харлаа гэж Удвалын ээж хэлж байсан. Харин шинжилгээ, эмчийн үзлэг бүгд өндөр төлбөртэй. Нэг  эмчид үзүүлэхэд 32.600 вонн байх жишээтэй. Эмчилгээ, шинжилгээний үнэ үүнээс ч өндөр. Нэгэнт эмч нарын хэлж байгаа болон шинжилгээний хариу сайн гарсан учраас охиноо бүрэн эмчлүүлэхийг Удвалын ээж аав хүсэж байна. Одоо Удвал охиныг батлан дааж эмнэлэгт хэвтүүлэх Солонгос хүнийг хайж эхэлжээ. Үгүй гэвэл дахин 10 сая гаруй вонн энэ гэр бүлд хэрэгтэй байна.Удвалын аав ээжийн Солонгос улсад байх визний хугацаа ирэх оны 2 сард дуусна. Хэрвээ охиноо эмчлүүлэх зардал эсвэл батлан даагчаа олчихвол визний хугацааг сунгах боломжтой гэж Инсей эмнэлгээс мэдэгдээд байгаа юм байна. БНСУ-д ирж удамшлын болон булчингийн хатингаршил гэсэн онош нь биш болж 100 хувь эдгэрнэ гэсэн сайхан хариулт хүлээн авсан Удвалын аав ээж ийм сайхан хариу сонсоход тусласан Монголын ард түмэн болон “Өгөх өдөр” аяныг зохион байгуулсан урлаг соёлынхон, төрийн бус байгууллагынхандаа маш их талархаж байгаагаа биднээр дамжуулан илэрхийлсэн юм.