Мэргэжлийн
сүмогийн холбооны ёкозүнагийн асуудал эрхэлсэн хороо өчигдөр хуралдлаа.
Кюүшюү башёд 17 дахь түрүүгээ авсан ёкозүна Хакүход амласан байсан
тусгай шагналаа өгөхөө болихоор шийдсэнээ тус хороо зарлаад байсан юм.
Учир нь Хакүхо Фүтабаяма их аваргын 69 дараалан ялсан амжилтыг эвдэж
чадаагүй билээ.
Гэвч сүмогийн түүхэнд хоёрдугаарт бичигдэх 63 дараалан ялсан амжилт тогтоосон гавьяаг нь үнэлж, шагналаа гардуулахаар шийдвэрлэсэн байна. Шагналыг нэгдүгээр сарын тэмцээний эхний өдөр гардуулах гэнэ. Тус хорооны тэргүүн Цүрүта “Уг нь 69 дараалан ялна гэж бодоод шагнал гардуулахаар зарласан байсан. Хэдийгээр тэр их аваргын амжилтыг эвдэж чадаагүй ч хоёр жил дараалан 86 яллаа. Кисэносатод унасныхаа дараа ч сэтгэл санаагаар уналгүй барилдсаар түрүүлсэн.
Ёкозүнагийн үүрэг хариуцлагаа бүрэн биелүүлсэн гэж үзээд шагнахаар шийдлээ” гэж мэдэгдсэн байна. Хакүход бэлэглэх шагналыг Токиогийн Урлагийн их сургуулийн захирал Мияата урлаж байгаа бөгөөд ёкозүнагийн бүсийг бэлгэдсэн байх гэнэ. Мөн ёкозүнагийн асуудал эрхэлсэн хорооноос Хакүход “Дохёны хаан” гэх мэт нэр өгөх санал ч гарсан гэнэ. Хакүхогоос өмнө уг хорооны тусгай шагналыг Тайхо, Китаноүми, Чиёнофүжи нар л хүртэж байжээ.
