Гадаадын
иргэний эрх зүйн байдлын тухай хуулийг УИХ шинэчлэн баталж, энэ оны
есдүгээр сарын 1-нээс мөрдөж эхэлсэн. Үүнтэй холбогдуулан Гадаадын
иргэн, харьяатын асуудал эрхлэх газар уг хуулийг дагаж гарах дүрэм,
журмуудыг шинэчлэхээр ажиллаж байна.
Засгийн газрын 2010 оны 119 дүгээр тогтоолоор баталсан “Захиргааны хэм хэмжээ тогтоосон шийдвэр гаргах журам”-ын 2.3.5, 2.3.6-д заасны дагуу “Гадаадын иргэнд Монгол Улсад хувийн хэргээр зорчих урилга олгох журам”, “Монгол Улсын харьяат хүүхдийг үрчлэх хүсэлт гаргасан гадаадын иргэнтэй ярилцлага хийх журам”, “Монгол Улсад гадаадын төрийн бус байгууллагын салбар, төлөөлөгчийн газрыг нээн ажиллуулах зөвшөөрөл олгох журам”-ын төсөл боловсруулан, олон нийтэд танилцуулж байгаа аж.
“Гадаадын иргэнд Монгол Улсад хувийн хэргээр зорчих урилга олгох журам”-ын төсөлд тусгасан зарим заалтаас дурдвал Исламын шашинтай орнууд болон БНХАУ-ын Төвд, Шинжаан Уйгарын өөртөө засах орны иргэнд урилга олгохдоо холбогдох байгууллагаас санал авч, 30 хоногийн дотор шийдвэрлэх юм байна. Урилга олгогч урилга олгохоос татгалзсан тохиолдолд шалтгааныг тайлбарлах үүрэг хүлээхгүй агаад урилгыг 30 хүртэл хоногоор олгоно.
Харин Монгол Улсын иргэний гадаад улсын харьяат гэр бүлийн гишүүнд 90 хүртэл хоногоор олгож болно. Урилгыг бичсэн өдрөөс хойш нэг жилийн хугацаанд хүчинтэй байна. www.immigration.gov.mn вэб сайтаас дээрх журмуудын төсөлтэй танилцаж, саналаа илэрхийлэх боломжтой.
