Их хаадын нэртэй Төрийн одонтой болох төслийг УИХ-ын нэр бүхий гишүүд санаачлан өргөн барьжээ. Хуучин шагналуудаас гадна шүү дээ. Үүнийг өчигдөр УИХ дахь Бүлгүүд хэлэлцээд түр хойшлуулахаар болсон байна. Төрийн одон, медалийн үнэ цэнэ алдагдаж, хавтгайрсан учраас шагналын тогтолцоонд өөрчлөлт хийх ёстой гэдгийг эрхэм гишүүд дэмжжээ. Гэхдээ уг асуудлыг хариуцдаг Ерөнхийлөгчийн Тамгын газраас бас төсөл боловсруулж буй, мөн төсөл санаачлагчид тодорхой шагналыг мөнгө дагалддаг байх санаа дэвш үүлсэн учир зардлын асуудал сөхөгдөж байгаа юм.
Төсөлд хөдөлмөрийн хөлсний доод хэмжээг 50-300 дахин нэмэгдүүлсэнтэй тэнцэх хэмжээний мөнгө Төрийн одон, медалийг дагалддаг байхаар тусгасан аж. Нийт 19 тэрбум төгрөг хэрэгтэй болох гэнэ. Мөн МАН-ын бүлгээр түлш, эрчим хүчний салбарын эрх зүйн орчныг сайжруулах, өр зээлийг шийдэх талаар ярилцжээ. Ингэхдээ иргэдийн нуруун дээр ачаалал үүрүүлэхгүй байхаар зохицуулах гэнэ.
Төрөөс үүний дагуу олгодог 15 тэрбум төгрөгийн татаасыг үргэлжлүүлэх, 2013 он гэхэд эрчим хүчний найдвартай эх үүсвэртэй болохоор төлөвл өжээ. АН-ынхан Зээлийн мэдээллийн сангийн тухай хуулийн төсөлд анхаарлаа хандуулсан байна. Зах зээлийн эдийн засагт шилжсэн сүүлийн 20 жилд банкны салбарт нэгдсэн мэдээллийн сан үгүй байгаа аж. Тиймээс нэг хүн хэд хэдэн банкнаас зэрэг зээл авах гэх мэт асуудал үүсдэг байна.
Бүх банкийг холбосон шилэн кабелийн сүлжээтэй, Үндэсний мэдээллийн сантай болсон учир энэ хуулийг хэрэгжүүлэхэд түвэггүй гэж АН-ынхан үзжээ.
