Солонгос улсад амьдарч байгаа П.Уранбилэг хэмээх бүсгүйгээс захидал ирлээ. Тэрбээр тус улсад харь хүний гарт хэрцгий байдлаар амиа алдсан Д.Ганцэцэг бүсгүйн төлөөх жагсаалд оролцжээ. Түүний бичсэн захидлыг бүрэн эхээр нь хүргэж байна. 2010 оны 11 дүгээр сарын 1 –нд Гуанжу хотноо болсон Талийгаач Д. Ганцэцэгийн 49 хоногт зориулсан буяны болон хүндэтгэлийн тайван жагсаалд  миний бие Солонгос дахь Монгол Эмэгтэйчүүдийн Холбоо болон Сорхугтаны Бэхи Хатан ТББ–гаа төлөөлөн, Сөүлээс талдаа 4 цаг гаран хурдны автобусаар явж оролцоод ирлээ. Уг цуглаанд 50 гаруй монголчууд оролцсон бөгөөд ихэнх нь Жоннамын Их Сургуулийн Монгол оюутнууд,  Монгол ажилчид, мөн Солонгос нөхөртэй Монгол эмэгтэйчүүд оролцов. Жоннамын Их Сургуулийн номын сангийн өмнөх талбайд 2010 оны 11 дүгээр сарын 1-ны 10 цагт  жагсаал эхлэв. Хөтлөгч 6.15 сургуулийн багш Жондалсон болон Нажу хотын Эмэгтэйчүүдийн Холбооны дарга Нандинцэцэг нар Нажу хотноо болсон хэргийн талаархи товч таниалцуулгыг Солонгос Монгол хэл дээр хийж, Гуанжу Жоннамын бурхан шашны нийгэмлэгээс Буяны ном уншиж, эмгэнэлийн шүлэг, дуу дуулж, талийгч Д.Ганцэцэгийн эгч Д.Дэлгэрцэцэг дүүдээ бичсэн захиагаа уншиж цуглааны эхний хэсэг  өндөрлөв. Цугларсан монголчууд лоозон, уриалгануудаа хувиарлан авч эгнээгээ эзлэн зогсож тайван жагсаалдаа бэлдэв. Уг газраас жагсаал маань хөдлөөд, бид 1 цаг гаруй Гуанжу хотын төвөөр явсаар төлөвлөсөн газар болох Гуанжу хотын Шүүхийн ойролцоох Жисаны 4 замд хүрэлцэн ирж,  Гуанжу хотын шүүхэд өргөн барих шаардлагыг  Нажу хотын эмэгтэйчүүдийн холбооны дарга Нандинцэцэг уншиж танилцуулав. Уг шаардлага нь “Гадаад бүсгүйчүүдийн хүний эрх (амьд явах эрх, аз жаргалыг эрэлхийлэх эрх, хэлний эрх, иргэний эрх, соёлын эрх зэрэг)-ийг дээдлэхийг шаардана, мөн Солонгос нийгэм (олон соёлт гэр бүл, нийгэм, төрд)–д оршиж байгаа гадаад бүсгүйчүүдийн талаархи бүрэн бүс ойлголт, ухамсрыг дээшлүүлэх”-ийг шаардсан  шаардлага юм.   Ингээд бүх Монголчууд энгэртэй зүүсэн гашуудлын болон хүндэтгэлийн улаан туузаа авч нэгэн хайрцганд цуглуулан хийв. Эдгээр туузнуудаа Гуанжу хотын шүүхэд барих шаардлага, мэдэгдэл бичгийн хамт Жоннамын Монгол Оюутны Холбооны дарга Жигжид, Нажу хотын Эмэгтэйчүүдийн Холбооны дарга Нандинцэцэг, талийгаачийн эгч болон хотынхоо эмэгтэйчүүдийн төлөөлөгчдийн хамт бүгд 5 хүн Монголчуудаа төлөөлөн Гуанжу хотын Дээд Шүүхэд хүргэн өгөв. Уг шаардлагыг Гуанжу хотын Дээд Шүүхийн бичиг хэрэг хүлээн авах хэсэгт бүртгэн авч уг хэргийн шүүх хурал 12 сарын 14- нд болохыг мэдэгдлээ. Уг цуглааны үед MBS, KBS TV, болон бусад мэдээлэл радиогын байгууллагуудаас хүрэлцэн ирж сурвалжлага хийж байв. Талийгаачийн эгч цуглааны дараа өдөржин наранд явсан бүх Монголчуудаа Гуанжу хотын сайхан хоолтой Монгол гуанзанд оруулж хооллосонд талархаж байна.      Бичигч миний бие уг цуглаанд оролцон мөн ажиглаж явахдаа уг цуглааныг хүний газар чадварлага, зоригтойгоор зохион байгуулж байгаа докторант Нандинцэцэгийг харахдаа бахархаж бас эмээх сэтгэл төрж байв. Бас нэгэн сэтгэл хөдөлгөсөн зүйл бол тэнд 2 монгол эмэгтэй, өлгийтэй хүүхдүүдээ тэврээд уг жагсаалд би монгол хүн гэдгээ харуулан өдөржин халуун наранд бидэнтэй хамт хөл нийлэн алхаж явааг харахдаа тэднийг хайрлаж, тэднээр бахархаж явлаа.