УДЭТ-ын жүжигчин СТА Б.Эрдэнэцэцэгийг "Сайн өдөр"-ийнхөө зочноор урьж ярилцлаа. Тэрбээр тус театрт 18 жил ажиллаж, 30 гаруй жүжгийн гол ба туслах дүрд  тогложээ.

-Та Улаанбаатар хотын уугуул уу. Нутаг усныхаа тухай тэр бүр яриад байдаггүй санагдана. Энэ сэдвээс яриагаа эхэлье?
-За тэгье, сайхан санал байна. Би Улаанбаатарынх биш. Завхан аймгийн Тэс сумынх. Энэ зун амралтаараа орон нутгаар нэлээд аялж. олон аймгаар явлаа. Төрсөн нутаг Завханаас гадна Архангай, Хөвсгөл, Сэлэнгэ, Булган зэрэг аймгаар явж байгалийн сайхныг биширсэн. Өнгөрсөн жилийн амралтаар гэр бүлтэйгээ далайд амраад ирсэн болохоор энэ зун зориуд аймгуудаар аялсан юм. Яагаад ч юм би их нутгархаг. Завханы хүн гэвэл ярих гээд л сүйд болдог зантай.

-Завханы хүүхнүүд сайхан төрдөг гэдэг?
-Миний бодлоор Архангай бүсгүйчүүд сайхан төрдөг болов уу. Харин манай Завхан хурдан хүлгээрээ
алдартай.

-Ингэхэд сэтгэлдээ хүртэл бүтээсэн ямар дүр байдаг вэ?
-Бүх дүрийг уран бүтээлч хүн зовж байж бүтээдэг. Жүжгийн сэдэв болгон өөр болохоор тухайн жүжигчнээс тэр хэмжээгээрээ авъяас, чадвар шаарддаг. Жүжиг болгонд ур чадвар гаргахгүй, нөгөө л Эрдэнэцэцэгээрээ тоглоод байвал хүмүүсийн сэтгэлд хүрч чадахгүй. Хэрэв өөрчлөгдөхгүй тоглоод байвал тухайн жүжигчний уран чадвар муу байгаагийн шинж. Тиймээс нэг жүжгийн дүрийг нөгөө жүжгээс өөрчилж хүмүүсийн сэтгэлд хүрэхээр тоглох ёстой. Ийм шаардлага уран бүтээлч бидэнд өдөр бүр тулгардаг.

-Хувийн амьдрал тань нэлээд нууцлагдмал байдаг. Хэдэн хүүхэдтэй вэ?
-Би хоёр хүүхэдтэй. Хүү, охин хоёртой.

-Дахиж маамуулах уу?
-Дахиж хүүхэд гаргах бодол бий. Хүүхэд үнэхээр хөөрхөн шүү дээ.

-Яг одоо ямар жүжигт тоглох гээд бэлтгэл хийгээд завгүй байгаа юм бэ?
-Театрын маань үзвэрийн 80 жилийн ой энэ онд тохиож буй. Ойдоо зориулж үзэгчиддээ түүхэн жүжгүүдээр бэлэг барьж байна. Яг одоо "Тамгагүй төр” жүжиг дахин тоглогдох гэж байна. Б.Лхагвасүрэнгийн "Атга нөж" жүжигт Сосорбарам, Н.Сувдаа нарын алдартнуудтай хамтарч тоглох болсондоо өөрийгөө хэмжээлшгүй азтайд тооцдог. Мөн УДЭТ-ын хамт олон “Красногоров-7” төслийг амжилттай хэрэгжүүлж өнгөрсөн хавар "Солиотой жүжиг”, "Яаж амьдрах юм бэ", "Хунгийн дуу", “Би ч гэсэн жаргамаар байна”, "Хүний хөнжлийг битгий сөх", "Хайрын домог", "Диваажингийн хаалга" зэрэг жүжгүүдийг театрын таван найруулагч найруулан тавьж Монголын театрт урлагийн түүхэнд шуугиан дэгдээж байсныг үзэгчид андахгүй болов уу. Одоо миний бие "Хүний хөнжлийг битгий сөх" жүжигт дахин тоглохоор бэлтгэлээ базааж байгаа маань энэ.

-Та дандаа л сайхан харагддаг. Энэ нууцаасаа хуваалцаач. Толины өмнө хэдэн цаг эргэлддэг вэ?
-Баярлалаа Би толины өмнө эргэлдээд байдаггүй. Зав ч байхгүй. Өглөө хальт мулт нүүрээ угаагаад л шууд ажил дээрээ ирдэг. Харин тоглолтын будалтаа хийхдээ сайн будаж авдаг юм. Эмэгтэй хүн сайхан харагдахад үнэтэй будаг, гоё ганган хувцас хэрэггүй. Гол нь ажил, амралтаа сайн зохицуулах хэрэгтэй. Тиймээс би ажил багатай үедээ их унтаж амардаг. Жаахан ч гэсэн завсарлага гарвал гэртээ хариад хөгжилдөө ороод унтаад өгдөг юм. Түүнчлэн гэр бүлийнхэнтэйгээ агаар салхинд их явдаг. Ер нь сэтгэл санаа амгалан тайван, оюун санаа саруул байх тусам эмэгтэй хүн өөдрөг сайхан харагдахын зэрэгцээ тэмүүлэлтэй амьдардаг. Өөрөөр хэлбэл, сэтгэл сайхан байвал хүний гаднах төрх, дотоод сэтгэл аяндаа өөдрөг байна.

-Таны тоглолтыг үзээд дүү залуу болзоонд уривал яах вэ?
-Гэр бүлтэй учраас би зөвшөөрөхгүй.

-Та нөхрөө харддаг уу?
-Харгүй хүн гэж байхгүй шүү дээ. Хар гэдэг зүйл бага хэмжээгээр байх ёстой Гэхдээ тун нь хэтэрвэл зохимжгүй. Нөгөөтэйгүүр үнэхээр хайр сэтгэлтэй бол хардаад байх нь дэмий зүйл.

-Та гэр бүлээ танилцуулахгүй юу. Урлагийн хүн үү?
-Манай хүн урлагийн хүн биш. Бизнесийн салбарт ажилладаг юм.

-Таныг хүмүүс яагаад ч юм ганц бие гэж боддог?
-Би анхны амьдралаасаа хойш олон жил ганцаараа явсан. Энэ хугацаанд өөрийнхөө бүх л зүйлийг уран бүтээлдээ зориулсан. Амьдралаа хоёрдугаарт тавьж байлаа. Одоо гэр бүлтэй болсон болохоор
ажлаасаа гадна хань, ээжийн үүргийг сайн гүйцэтгэх гэж зүтгэж явна. Энэ нь эмэгтэй хүн болгоны үүрэг л дээ.

-Тэгвэл Таны бодлоор хайр гэж юу вэ?
-Хайр бол итгэл. Агуу зүйл, харьцангуй том ойлголт гэхчилэн хүмүүс янз янзаар ярьдаг. Тэгээд ч зарим хүмүүс хайрыг их том юмнаас хайдаг. Харин миний хувьд хайр жижигхэн юман дээр ч байж л байдаг. Өчүүхэн зүйлээс ч хайр илэрдэг.

-Та энэ урлагийн гэгээн сүмдээ хэдэн цагийг өнгөрөөдөг вэ?
-Олон цагийг өнгөрөөдөг. Гэгээн сүм учраас хүн болгоны сэтгэлийг татдаг шигээ ажиллаж байгаа хүмүүс нь гэрэлтэж байх ёстой гэдэгт итгэдэг. Хүмүүс ярьдаг л даа. Урлагийн хүмүүс сайхан энергитэй гэж. Бидний дунд таван минут байж байгаад гарахдаа их сайхан боллоо гэдэг. Зам түгжрээд гудамжинд ууртай явж байгаад л театртаа ирэхэд сэтгэл сэргээд л ирдэгсэн.

-Бурхан Таныг арван насаар залуужуулж өгье гэвэл зөвшөөрөх үү?
-Ийм зүйл тохиолдвол арай өөр зүйл гуйна.

-Нууц биш бол юу вэ?
-Энэ нь одоогоор нууц үлдэг. Залуужуулна гэхээс ирээд буцдаг энэ хорвоод хүн жам ёсоороо амьдарвал сайхан.

-Таны аманд байнга жижүүрлэдэг ямар үг байдаг вэ?
-Амьдрал сайхан гэдэг үгийг л би хэлэх дуртайдаа.

-Таныг нүд, хөмсөг, уруулын тань аль их чимдэг вэ?
-Намайг үс маань их чимдэг байж. Өнгөрсөн жил үсээ гэмтэхээр нь хусуулчихсан юм. Өтгөн урт хар үс намайг сайхан харагдуулдаг байсныг сүүлийн үед бүр сайн мэдэрч байна. Гэхдээ удахгүй сайхан эрүүл урт үс ургах байх.

-Та хатны дүр нэлээд амилуулсан. Бүтээхсэн гэж зорьж явдаг дүр бий юу?
-Тийм шүү, би хатны дүрд их тоглосон байдаг. Үүнээс гадна дандаа эерэг дүр бүтээсэн. Б.Лхагвасүрэн гуайн "Гэгээн тамлан”жүжгийг манай Энхтуул бид хоёр хувиараа "Чимээгүй шөнө" нэртэй болгож тайзнаа амилуулж байв. Эл жүжигт л өөрийгөө өөрчилж эсрэг талын дүр бүтээсэн дээ. Түүнчлэн "Харц хатан" жүжгийн Сэржмядагийн дүрээр 2007 онд Гэгээн муза наадмаас дуулал жүжгийн төрөлд нэр дэвшиж шилдэг жүжигчин болж байсан. Энэ дүрийг бүтээх гэж олон сар зүтгэсэн. Тав зургаан сар сургуулилт хийсэн.  Тиймээс энэ жүжигт миний хөлс хүч ихээр шингэж сайн тоглосон гэж бардам хэлдэг юм.

-Б.Эрдэнэцэцэг гэдэг жүжигчин хамгийн сүүлд хэзээ тэсэртлээ уурлаж бас сэтгэлээ барьж чадахгүй болтлоо баярласан бол?
-Би нэг их уурлаад байдаггүй. Тайван. зөөлөн талдаа л даа. Гэхдээ хүн болсон хойно уурлах зүйл гаралгүй яахав. Ийм тохиолдолд хашгирч дуугаа өндөрсгөж байсангүй. Бясалгалд явж байсан маань үүнтэй холбоотой байх. Хүний бие хэл сэтгэл гурав их цагаан байх ёстой. Хүн амнаасаа аль болохоор буруу зөрүү үг унагахгүй, муу муухай зүйл бодож тээхгүй байх хэрэгтэй юм билээ. Энэ бүхнийг би сайн эрхэмлэж явдаг. Харин баярлах зүйл зөндөө тохиолддог. Гэр бүл, хань ижил маань цаг үргэлж л баярлуулж байна шүү дээ.