Улсын клиникийн төв эмнэлэг өөрийн гэсэн хүчилтөрөгчийн
үйлдвэртэй болсныг өчигдөр албан ёсоор нээлээ. Монголд анх удаа нээгдэж
буй хүчилтөрөгчийн үйлдвэрийг Монгол Улс Чехийн Засгийн газар хоорондын
хэлэлцээрийн дагуу 200 гаруй мянган еврогийн хөрөнгө оруулалтаар
байгуулсан байна.
Өмнө нь манайх хүчилтөрөгчийн хэрэглээгээ гадаадаас, зориулалтын бус бүтээгдэхүүнийг худалдааны шугамаар авдаг байжээ. Энэхүү үйлдвэр нь хоногт 20 орчим баллон буюу нэгдүгээр эмнэлгийн хэрэгцээнээс хоёр дахин их хэмжээний хүчилтөрөгч үйлдвэрлэх хүчин чадалтай юм байна. Хүчилтөрөгчийг эмнэлгийн хананд дамжуулах системийг байрлуулж түгээх аж.
Хэрэгцээнээс гаднах 10 орчим баллоныг бусад эмнэлгүүдэд нийлүүлэх боломжтой болжээ. Эрүүл мэндийн сайд С.Ламбаа “Чех улсын тусламжаар байгуулсан эмнэлэгт тус улс дахиад ийм сайхан үйлдвэр байгуулж өглөө. Энэ үйлдвэр нь Америк, Европын стандартын хүчилтөрөгчийг Франц, Германы тоног төхөөрөмжөөр үйлдвэрлэх тул цэвэршилт сайтай, найдвартай байна гэсэн үг.
Оны эхэнд бид эмнэлгүүдэд 30-аад жил ашигласан 100 баллоныг сольж, шинэчилсэн. Гэвч эмнэлэгтээ баллон тавиад ажиллаж байгаа манайх шиг газар байхгүй. Хананд дамжуулах хоолой байрлуулан түгээх ёстой” гэв. Цаашид Эх нялхсын эрдэм шинжилгээний төв, ХӨСҮТ, ХСҮТ зэрэг томоохон эмнэлгүүдийг өөрийн гэсэн хүчилтөрөгчийн үйлдвэртэй болгохыг зорьж байгаа юм байна.
