Манай оронд нүдний өвчин, түүнээс улбаатай хүндрэл, эмгэгүүд нэмэгдэж байгаа ч найдвартай эм тариа, мэс ажилбарын багаж хэрэгсэл хомс байдаг аж. Дэлхийн 180 гаруй орныг нүдний мэс заслын багаж хэрэгсэл, эм тариагаар хангадаг АНУын “Алкон” компани манай оронд үйл ажиллагаа явуулж эхэлжээ.
Ийнхүү дэлхийн томоохон компани Монголын “Чоно гол трейд” компанийг сонгон хамтарч ажиллах гэрээнд өчигдөр гарын үсгээ зурлаа. Тус компанийн захирал Ө.Байгальмаа “Нүд хамгийн эмзэг эрхтэн байдаг. Дэлхийд алдартай, найдвартай чанартай эмнэлгийн хэрэгслээр монголчууддаа үйлчлэх болсондоо бид баяртай байна. Бид богино хугацааны ашгийн төлөө бус урт хугацааны чанартай найдвартай хэрэглээг эрхэм болгон ажиллах болно” гэв.
Гарын үсэг зурах ёслолын ажиллагаанд АНУ-ын “Алкон” компанийн Хятад, Монголыг хариуцсан захирал Тоод Заводник тэргүүтэй удирдах ажилтнууд ирсэн. Нүдний гэж алдаршсан ардын эмч, профессор Ж.Баасанхүүтэй уулзахад “Монгол Улсад нүдний өвчлөл эрс нэмэгдэж байгаа нь бусад өвчнөөс улбаатай.
Сүүлийн үед чихрийн шижин газар авах хандлагатай байна. Энэ өвчин нүдний торлог шилэнцрийг гэмтээн улмаар хараагүй болгох ч аюултай. Гарцаагүй шаардлагатай энэ цаг үед дэлхийд алдартай нүдний өвчнийг анагаах эм тариа, бараа бүтээгдэхүүнийг улсдаа борлуулдаг болж байгаад маш баяртай байна. Чанартай эм тариаг бид хурал цуглаанд оролцох гэж гадаад явахдаа цөөхнөөр нь худалдан авдаг байсан.
Одоо хоёр хөршөөсөө гуйж, хайх шаардлагагүй боллоо” гэв. “Алкон” компанийнхан “Болор мэлмий” эмнэлгийн хамт олонд торлог шилэнцрийн хагалгаанд хэрэглэдэг аппарат бэлэглэсэн юм.
