“Битгий айгаарай, хүүгийн чинь царай харахад нэлээд эвгүй шүү” гэж Светлана амаржих газраас гарахынхаа өмнөхөн нөхөртөө утсаар хэлжээ. Өлгийтэй хүүгээ гар дээрээ аваад Андрейн зүрх жигтэйхэн хүчтэй цохилов гэнэ. Ванечка хүү төрөлхийн гавал, нүүрний ясны гажигтай байв. Үүнээс үүдээд хүү гүйцэд амьсгалж чадахгүй. Хүүгийн зүрх бас хэвийн биш байлаа. Ээж нь хүүгээ төрүүлснээс хойш гурав хоног юм идсэнгүй. Эмч нар ч хүүг нь хэд хоног бас авчирсангүй. Хэд хоноод босож, хүүгээ харав.

Хүчилтөрөгч дутагдсанаас бие нь харласан байв. Дөрөв хоноод байтал ээж хүү хоёрыг өөр эмнэлэгт шилжүүлэх боллоо. Юм хумаа аваад доош бууж явтал нэг эмч хонгилоор явангаа “Тэр хоёрыг бушуухан явуул. Тэгэхгүй бол нөгөө Глебов нь энд үхээд хариуцлагыг нь бид хүлээх болно шүү” гэж сувилагчид хэлэх нь сонсогдлоо. Түргэн тусламжийн машинд ороод Света хүүгээ анх удаа гар дээрээ барьж үзэв.

Харласан царайтай, ер бусын том, бүлтрээд гараад ирэх нь үү гэмээр нүдтэй, уруул нь чичирсэн бяцхан амьтан хэржигнэн амьсгална. Эмнэлэгт очоод хүүгийнхээ зүрхийг нь үзүүллээ. Чин үнэнийг хэлэхэд хүү чинь тэсэхгүй л болов уу хэмээн эмч илэн далангүй хэллээ. Тэр өдөр эмнэлэг дотор нэг лам явж харагдав. Света гүйж очоод “Хүүг минь загалмайлж өгөөч. Тэнгэрт очсон ч загалмайтай байг” гэв. Лам ёсоор болголоо.

Эмнэлэгт очоод гурав хонож байтал Васягийн бие улаарч ирэв. Харлаад, хөхрөөд байсан нь удалгүй арилав. Түүгээр ч барахгүй эхийгээ хөхлөө. Сүүгээ угжинд хийж өгсөн чинь хүү нь хоёр сорсноо хамраараа амьсгалж чадахгүй учраас агаар залгих гэж угжийг гараараа түлхэв. Сарын дараа ээж хүү хоёр гэртээ харилаа. Үс нь бууралтаж яваа аав нь эмнэлгийн гадаа угтахдаа хүүгээ “Хамгийн хөөрхөн хүү минь” хэмээн шивнэж байв.

Ваня хүүг зургаан сартай байхад нь Москвад аваачиж мэс засал хийлгэлээ. Тархины мэс засалчид долоон цаг ажиллав. Хүүгийн гавлын яс нь буруу байрлалтай байснаас тархийг нь дарж, амь насанд нь аюул учруулж байжээ. Тэр ясыг тайрав. Хүүгийн даралт хэвийн болж, яваандаа хамраараа амьсгалах болов. Ваня хүү одоо мөлхөж, юм түшээд босох гэж оролдож, бүхнийг ойлгож юм хэлж сурч байгаа. Хоолоо өөрөө идчихнэ.

Нүдийг нь эмч нар хэвийн болгож өгөх байх гэж Светлана найддаг. Хүүгийн нүд нь ер бусын том, бүлтгэр болохоос биш хараа нь зүгээр...

Р.ЖАРГАЛАНТ