БНСУ-д бусдын гарт амиа алдсан монгол эмэгтэйн оршуулга болж, ар гэрийнхэн нь Монголоос ирсэн байгаа тухай мэдээлсэн. Тэднийг буцахын өмнө уулзав. Талийгаачийн ээж Д.Нарантуяа, төрсөн ах Б.Ганбат, үеэл Б.Баттөгс нар "Корейн айр"-ийн нислэгээр Монгол руу явсан юм. Талийгаачийн ээж болон төрсөн ах нь төдийлөн ярихыг хүссэнгүй. Б.Ганбат "Хүнээ бусдын гарт хөнөөлгөсөн хүмүүс сэтгэл санаа ямар байх нь ойлгомжтой. Бид эхээс гурвуулаа юм. Би дээрээ нэг эгчтэй. Отгон дүү маань ингэж золгүй явдалд өртлөө..." гэв.

-Ажил явдал санасан хэмжээнд тань хүртэл амжив уу?

-Сайн санаат хүмүүс их тусаллаа. Дүүгийнхээ цогцсыг чандарлаад хоёр хоног дэргэдээ байлгаж одоо тээж явж байна. Цаг хугацааны боломжоос шалтгаалаад энд чандарлууллаа.

-Дүүгийнхээ талаар дурсахгүй юу?

-Бид Улаанбаатарт өсч төрсөн улсууд. Дүү маань дунд сургуульд байхын хичээлдээ сайн, хичээнгүй, бас айлын бага гэдэгутгаараа эрх танхи охин байлаа. "Сэрүүлэг" дээд сургуулийг Солонгос хэлний мэргэжлээр төгссөн юм. Ер нь их гэнэн цагаахан, бусдад тусламтгай. Дүүгийнхээ тэр сайн сайхан зан чанарыг буруутгана гэж юу байхав гэхдээ тэр зангаасаа болоод л ийм аймшигт хэргийн золиос боллоо. Зүс царай хэний ч дор орохооргүй, тэгш бие хаатай сайхан охин...

-Хүү нь дөрвөн сар өнгөрч байгаа гэсэн. Аавтайгаа үлдэх үү?

-Тийм ээ, аавтайгаа үлдэнэ. Хүргэний ээж нь 60 гарсан настай хөгшин байдаг. Түүнтэй хамт миний эгч хүүг асрахаар болж байна. Хүү зүрхний цооролттой төрсөн гээд бас байнга эмнэлгээр явдаг ёстой юм. Тиймээс туслах гэж эгч маань ирээд энд нэг их удаагүй л байлаа. Дүүгийн нөхөр ч одоо хэцүү л байна. Бас бэртсэн, гэхдээ хөл дээрээ явахтайгаа.

-Хэргийн талаар та нарт цагдаагийн байгууллагаас ч юм уу мэдээлэл өгсөн үү?

-Дүү охин маань тэр нөхрөөсөө зугтаж гэрт нь бүгсэн Эрдэнэцэцэг гэдэг охинтой эртнээс танилцаад, тусалдаг байсан юм байна лээ. Хэцүү зовлонт амьдралаа ярьдаг тул нэг бус удаа гэрт нь ч очиж нөхцөлийг нь үзэж байж. Тэгээд л тэр удаа аргагүй хөөгдөөд ирэхээр нь гэртээ байлгаж. Цаад Эрдэнэцэцэгийн нөхөр бол "Энэ л миний эхнэрийг гаргахгүй, бид хоёрыг уулзуулахгүй байна..." гэж санаатайгаар алах зорилготой ирсэн байх магадлалтай гэж үзэж байгаа юм байна лээ. "Би эрүүл байна, эхнэрээ очиж авъя" гэж хаягийг нь заалгаж гэрт нь ирсэн байдаг. Тэгээд эрүүл болоод ир гэж хэлсний төлөө түрийнээсээ жижиг хутга гаргаж ирээд хэргийг үйлдсэн. Талийгаачийн биед долоон удаа мэс хүрсэн байгаа шүү дээ. Сэтгэцийн өөрчлөлтгүй, эрүүл хүн болох нь нотлогдсон гэсэн.

-Түүний ахуй амьдрал ямархуу байсан бэ?

-Тэр алуурчин эхнэрээ авна гэхээсээ гадна миний дүүгийн амьдралд бас атаа жөтөө байсан болов уу гэж цагдаа нарын ярианаас би гадарласан. . Дөрвөн давхарт, гурван өрөө байртай, нөхөр нь хүн орхоодойн тариалангийн аж ахуйн эрхэлдэг. Хүн орхоодой бол БНСУ-д төдийгуй улс орнуудад хичнээн үнэтэй бүтээгдэхүүн болохыг бүгд мэднэ. Ургац л сайн авбал орлого нь тасралтгүй л байдаг аж ахуй шүү дээ. Хүргэн эхээс дөрвүүлээ. Аав нь хоёр жилийн өмнө өөд болсон байдаг юм билээ. Одоо ээж нь "Талийгаачийн хүүг ямар ч байсан хөлд ороод гүйдэг болтол нь харж чадах байх..." гээд л дүүг маань дурсаж уйлж л сууна.

-Монголд очоод оршуулга хийх үү?

-Чандрыг монгол ёсоор хөдөөлүүлнэ, цайлга үйлдэнэ. Ах дүү, хамаатан садан маань бэлтгэл хангасан. Эгч Б.Дэлгэрцэцэг маань талийгаач дүүгийн хүүхдийг асрах тул бичиг баримтыг нь тус тусын хамаарлаараа энд байгаа Монголын Элчин сайдын яам болон Монгол Улсад суугаа БНСУ-ын Элчингээс янзалж өгч байна. Тэгээд хэргийг шүүх болон бүх үйл явдалд би өөрийн биеэр орох бодолтой байгаа. Настай ээжийгээ нааш цааш явуулаад яах билээ дээ. Оршуулгад оролцсон монголчууд нийтдээ 2,5 сая төгрөгийн мөнгөн тусламж үзүүлжээ. Бас энд байх хугацаанд байнга унаа тэргээр тусалж байсанд талархаж байгаагаа илэрхийлж байна лээ. Гэмт хэрэгтний эхнэр Х.Эрдэнэцэцэг 20 настай. Түүний талаар тэр орчимд байгаа монголчуудын яриаг үзвэл нөхөртөө байнга зодуулж, цочиж, мэгдсэн байдалтай, өрөвдөлтэй амьдардаг байсан аж. "Ханбэт" гэх зуучлалын компанийн шугамаар гэрлзлт зохиосон нэгэн аж. Х.Эрдэнэцэцэгээс ч дутахааргүй зовж зүдэрч байгаа олон монгол охин "Ханбэт" компаниар зуучлуулан ирсэн байна лээ гэх монгол эмэгтэй ч байв.