Найман сартайгаасаа ярьж эхлэн, нэг ой таван сартайгаасаа сонин хэвлэл уншиж, гурван настайгаасаа нарны аймаг, галактикийн тухай ярьж эхэлсэн хүү, нүдээ боож байгаад урд нь харж байгаагүй гэрэл зурагт юу байгааг хэлж, мөн ямар нэгэн сэтгүүлийг хөлөөрөө тэмтрээд доторхыг нь уншдаг охин гээд л олон гоц авьяастай хүүхдүүд сүүлийн жилүүдэд мэндлэх болсон.

Шинэ эрин зууны индиго хүүхдүүд гэсэн тодотголтой энэ багачууд эхээс төрсөн даруйдаа л ухаалаг, дөлгөөн харцаар орчноо харж эмч нарыг гайхшруулдаг. Индиго хүүхдүүдийг өрнөдөд 1970 оноос эхлэн судлах болсон. Тэд 1970-аад онд маш цөөн тоотой байсан бол жилээс жилд олширсоор байсан юм.

Харин одоо шинээр төрж буй бараг бүх хүүхэд индиго аж. Индиго хүүхдүүд нь гоц содон авьяастайн дээр хурц хэрсүү, эрх чөлөөт сэтгэлгээтэй учраас тэдний арга эвийг олоход хүндрэлтэй байдаг аж. Хүүхдийнхээ сонин содон ааш авирыг ойлгохгүй, яаж харьцах аргаа олохгүй аргаа барсан эцэг, эхчүүд сэтгэл зүйн төвүүдэд ихээр хандах болсон. Монголд ч бас иймэрхүү асуудал гарах болсон ч индиго хүүхдийг судалдаг, тэдэнтэй холбоотой асуултад хариулт өгч чаддаг байгууллага ганцын зэрэг байна.

Уншигч та бүхэнд индиго хүүхдийн хөгжлийн төвийг санаачлагч, багш Ж.Хорлоогийн ярилцлагыг хүргэж байна.

-Индиго хүүхдүүд гэж хэн бэ, бусад хүүхдүүдээс юугаараа онцлогтой вэ?
-Эрин эрний хүмүүс хоорондоо ялгаатай байдаг. Нэг ёсондоо эрнээс эринд боловсронгуй болдог гэсэн үг юм. Индиго нь мэдээлэл технологийн эринд зохицсон хурдан сэтгэдэг, онцгой чадамжуудтай хүмүүс юм. Тэдний баруун, зүүн хоёр тархи нь зэрэг хөгжсөнөөр нь энгийн хүмүүсээс ялгаатай болгосон. Энгийн хүмүүс бидний нэг тархи нь хөгжсөн байдаг. Тиймээс хоёр тархи нь зэрэг хөгжсөн индиго хүүхдүүд төрөлхийн нэг авьяастайн дээр сэтгэлзүйн хувьд ч мөн өвөрмөц байдаг. Сахилгагүй, сониуч, зөрүүд гээд л.

-Индиго хүүхдүүдтэй яаж харьцах вэ?
-Сүүлийн үед эцэг, эхчүүд индиго хүүхэдтэй яаж харьцахаа мэдэхгүй байгаагаас тэдний авьяас чадвар, хүсэл тэмүүллийг нь мөхөөж байна. Тэд бусад шиг энгийн байдаггүй. Түүний онцлог зан суртахуунд тохирсон харилцааг олж түүнтэй харилцаж, ойлгож мэдэхгүй байгаагаас болж тэдний авьяас чадвар хөгжих боломжгүй болоод байгаа. Нэг жишээ дурдъя л даа. Гурван настай Т хүүг аав ээж нь цэцэрлэгт оруулсан аж. Гэвч хүү цэцэрлэгийн багш нарын дургүйцлийг хүргэж тэр цэцэрлэгээс гарч улмаар хэд хэдэн цэцэрлэг сольсон байна. Т хүүгийн эмээ нь ачийгаа харахыг хүсч хөдөө гэртээ авчруулжээ. Гэтэл ганц хоноод л хүүтэй байж чадахгүй нь гэжээ. Түүний дараа Т хүү хамаатныдаа тоглож байгаад нэг хүүхдийн толгойг том төмрөөр цохиж гэмтээжээ. Иймэрхүү таагүй асуудлуудаас болоод аав, ээж нь надад хандаж, би хүүтэй уулзсан юм. Би хүүгээс “Чи ухаантай юу” гэж асуухад тэр “Би ухаантай биш” гэж хариулж байгаа байхгүй юу. Яагаад ийм хариулт өгсөн бэ гэвэл хүү сэргэлэн зандаа хөтлөгдөн аливаа зүйлийг сонирхож оролддог.

Хүүгийнхээ сонирхолдоо хөтлөгдсөн хөдөлгөөнтэй байдлыг аав ээж нь сахилгагүй, зөрүүд, бүтэлгүй гэж ойлгож, чи сахилгагүй, чи муу хүүхэд гэж загнадаг. Үүнээс болоод хүү би муу хүүхэд гэсэн бодолтой болсон байсан. Дараа нь би “Чи том болоод юу болох вэ” гэж асуухад тэр “Би баатар болно” гэсэн. Тэр хүүхэд хурц дайчин зан чанартай байгаа юм. Тэгэхээр түүний төрөлхийн авьяас нь зодооны урлаг байж болно. Тэгэхээр түүнийг зөв замд нь чиглүүлж зодооны урлагаар хичээллүүлэх хэрэгтэй. Тэр хүүхдэд чи муу хүн биш харин эсрэгээр нь чи сайн хүн гэдгийг ухамсарлуулах ёстой. Хүүд хүний толгой руу цохиж болохгүй гэдгийг хэн ч ойлгуулж хэлж өгөөгүй байгаа юм. Түүнд хүнийг цохиж болдоггүй юм, өвдөөд уйлдаг юм гээд эелдэг зөөлнөөр тайлбарлаж өгөөд ойлгуулбал тэр шууд тусгаж авах чадвартай.  Тайлбарлаагүй л учраас ойлгохгүй байна. Харин авьяасыг нь дэмжих тал дээр түүнд мышок зэрэг зүйл аваад өгч болно. Чи харин энэ зүйлийг цохиж болно гээд л.

-Хүслээр нь явуулахгүй байснаас буруудсан жишээ байдаг уу?
-Тэд хүслээ ямагт нэгдүгээрт тавьдаг учраас хүсэл сонирхлыг нь дээд зэргээр хүндэтгэх хэрэгтэй. Насанд хүрсэн нэг эмэгтэй байдаг. Одоо тэр нэг яаманд орчуулагч хийдэг юм. Тэр нохойд их хайртай. Бага байхдаа л хаана нохой явна тэнд байдаг. Бүр нохойг үнсэж үнгээд л маш элгэмсүү ханддаг байж л дээ. Гэр бүлийнхэн нь эмэгтэй хүүхэд байж дандаа нохойтой зууралддаг гэж загнадгаас болоод зарим нь түүнийг нүд үзүүрлэж, гадуурхах болсон байна. Энэ бүхнээс болоод түүний авьяас унтарчихаж. Үнэндээ тэр Монголд нэг даруухан орчуулагч хийж явахгүй байсан. Дэлхийд алдартай нохой сургагч, гайхамшигт үзүүлбэр үзүүлдэг эмэгтэй байж болох л байсан юм. Тэдний төрөлх авьяасыг нь хөгжүүлж дэмжихгүй бол энгийн нэгэн л болж хувирдаг.

-Тэд хүмүүсийн зөвлөгөөг хэр хүлээж авдаг вэ?
-Индиго хүүхэд нь уламжлалт зан үйлд захирагддаггүй, хүний аясаар явдаггүй юм. Харин хүнд заадаг. Ер нь орчин үеийн хүүхдүүдэд бид сургах биш өөрсдөө тэднээс суралцах болчихоод байгаа. Бид зөвхөн тэднийг амьдрал практикдаа тулгуурлан чиглүүлж, зөв замаа сонгох боломжийг нь олгох хэрэгтэй. Сонголт хийхэд нь туслах хэрэгтэй. Аав ээжийнхээ үгэнд ор гэдэг бол их муухай үг. Ингэж сургавал хүүхэд сэтгэхгүй номхон морь шиг болж хувирна. Өөрөөр нь яриулж, өөрөөр нь бодуулж, өөртэй нь ярилцаж, сонголтыг нь хийлгэ, өөрөөр нь зөв бурууг ялгуулах хэрэгтэй.

-Одоо айл бүрт индиго хүүхэд байгаа гэсэн, энэ үнэн үү?
-Тийм тийм. Бараг айл болгонд индиго хүүхэд төрж байгаа.

-Индиго хүүхэд физиологийн хувьд ямар онцлогтой байдаг вэ?
-Тэд өөрөө өөрсдийгөө анагаах чадвартай байдаг. Сэжгээр өвдөж, сүжгээр эдгэнэ гэж Монголчууд маань ярьдаг. Яг үүнтэй адил тэд маш цэвэр ариун сэтгэлтэй, энерги ихтэй учраас бараг өвддөггүй. Тэд худал хуурмаг, муу зүйлийг дэмждэггүй их цагаахан сэтгэлтэй.

-Сүүлийн үед индиго хүүхэдтэй эцэг, эхчүүд тэр нь болохгүй байна, энэ нь болохгүй байна гэж таныг зорьж ирж байна уу?
-Ихэвчлэн цэцэрлэгүүд авахгүй байна гэж ирдэг. Гол нь эцэг, эхчүүд хүүхдүүддээ болохгүй байгааг нь ойлгуулах хэрэгтэй. Тэдэнтэй хамгийн ойр байдаг хүмүүс эцэг, эх нь учраас энэ хариуцлагыг үүрэх ёстой. Автобусанд уйлдаг хүн байдаг уу? Гудамжинд явж байгаад юм авахуулна гэж уйлж байгаа хүүхэд ямар харагдаж байна гэх мэтчилэн жишээ татан өөртэй нь ярилцаж байгаад ойлгуулах хэрэгтэй. 2025 он гэхэд энэ хүүхдүүд бүгд насанд хүрч эх орноо авч явах учраас сурган хүмүүжүүлэгч хэн ч бай хариуцлагатай байх хэрэгтэй.