ОХУ-ын 578 газар түймэртэй байна. Албаны мэдээгээр тэдгээрийн 33 түймрийг унтраажээ. Түймрийн хамрах талбай 10 мянган га-гаар багассан байна. Түймрийн дэгдэлт намжихийн хэрээр ерөнхийлөгч Дмитрий Медведев Владимир, Воронеж муж, Бүгд найрамдах Мариал улсад тогтоосон онц байдлыг цуцлах зарлиг гаргав. Тэрбээр онц байдлыг шат дараатай цуцлах гэнэ.  

Хэдийгээр түймрийн байдлыг бүрэн хяналтад авсан хэдий ч удаан үргэлжилсэн түймрийн утаа олон газрыг бохирдуулж, агаарын чанарыг эрс муутгасан байна. Ялангуяа Москва хот, түүний ойр орчмын бүс сүүлийн хоёр долоо хоногийн турш өтгөн утаанд бүрхэгдэж, хүмүүс аргагүй эрхэнд амны хаалт хэрэглэх болсон юм. Өнгөрөгч долоо хоногийн эхээр Москва орчмын бүсэд зөөлөн салхи салхилж, улмаар утаа аажим аажмаар сарниж байгаа юм. Оросын цаг уурын газрын мэдээлснээр түймрийн утаа сарниж байгаа ч Москвагийн ойр орчмын экологийн байдал төдий л сайн биш байгаа гэнэ. Албаныхны онцолж буйгаар салхины чиглэл эргэж болзошгүйг анхааруулав. Хэрэв ингэвэл Москва хотыг дахин утаа манан бүрхэх юм.

Дэлхийн байгалийн сангийн биологичид Оросын түймэр болон түймрийн утааг дүгнэхдээ “Урьд өмнө гараагүй Оросын ойн түймэр болон үүнээс үүдсэн нүүрстөрөгчийн давхар исэл агаар мандлын давхаргад орж, уур амьсгалын өөрчлөлтийг түргэсгэж болзошгүй юм. Нүүрстөрөгчийн давхар исэл өтгөрөхөөрөө цаг уурын системийн тэнцвэрийг алдагдуулж, бүгчим халуун уур амьсгалтай болно. Үүний улмаас байгалийн олон гамшиг гарахад хүргэдэг” гэжээ.

Гал түймрээс бий болсон нүүрстөрөгчийн давхар исэл нь түймэр бүрэн унтарсны дараа ч агаар мандлын давхаргад хадгалагддаг аж. Тиймдээ ч 30 жилийн дотор их хэмжээний нүүрстөрөгчийн давхар исэл болж задрах юм. Тус улсын эрдэмтэд түймрийн утааны хор уршгийг хэрхэн арилгах талаар судалгаа хийж байгаа. Гэсэн ч хүний чадвар байгалийн чадлыг дийлэхгүйг ойлгожээ. Тэд ямартай ч түймрийн утааг байгаль өөрөө арилгахад найдаж байна.

Ойн түймрээс үүдсэн нүүрстөрөгчийн давхар исэл нь орчин тойрон, хүний бие махбодод хор хөнөөл учруулахаас илүү цацраг идэвхт бодисын тархалт үүсгэж болзошгүй гэнэ.

Тус улсын баруун нутгийн Чернобыль цөмийн цахилгаан станцын цацрагийн бохирдлын нөлөөнд өртсөн Брянская мужид өнгөрөгч зургаанд түймэр гарсан байна. Хэрэв уг мужид онц байдал зарлах хэмжээний түймэр дэгдвэл цацрагийн түвшнийг нэмэгдүүлж болзошгүй гэнэ.

ОХУ-ын мужуудын ойн аж ахуйн газар тэрчлэн бусад гал түймрээс урьдчилан сэргийлэх байгууллагууд Брянская мужид түймэр их хэмжээгээр дэгдэхээс сэрэмжилж байна. Ямартай ч Онц байдлын сайд Сергей Шоуйгу мэдэгдэхдээ “Эдүгээ Брянская мужид дэгдсэн түймэр тогтвортой байна. Бид түймрийг өндөр хяналтан дор унтрааж байгаа. Удахгүй цурманд оруулна” гэв.

Зарим хэвлэлийн бичсэнээр Брянская мужийн дийлэнх нутагт түймэрийн тархалт их байгаа гэнэ. Гэсэн ч албаныхан үүнийг үгүйсгэв. Мөн тэд түймрийн талаарх худал мэдээллийг иргэдэд өгөхгүй байхыг анхааруулжээ. Түүнчлэн цагдаа, цэргийн хүчин түймрийн дэгдэлт намжсан хот сууринд хяналтаа чангатгасан байна. Учир нь түймрийг далимдуулж, дэлгүүр, томоохон худалдааны төв, байшин барилгаас хулгай хийх нь ихэссэн гэнэ.  ОХУ-д түймэр гарсантай холбогдуулж дэлхийн олон орон тусламжийн гараа сунгаж байна. Үүнд ерөнхийлөгч Дмитрий Медведев талархаж байгаагаа илэрхийлжээ.