Өмнөд Солонгост ажиллаж, амьдарлаа дээшлүүлэх хүсэлтэй иргэд ээлжит шүүлтүүртээ орж байна. Солонгос хэлний түвшин тогтоох шалгалтад орохоор нийт 14600 хүн бүртгүүлснээс 12352 нь хэлний шалгалтад орсон. Тэдний 3105 нь шалгалтад тэнцэж, өчигдрөөс эрүүл мэндийн үзлэгтээ хамрагдаж эхэллээ. Харин квотод багтаж чадаагүй иргэдийн зүгээс хэлний шалгалтын явцад булхай орсон, шалгалтын материал задарсан гэх гомдлыг гаргаад буй.

Эдгээр иргэний гомдлыг Гадаадад ажиллах хүч илгээх төвийнхөн Өмнөд Солонгосын талд уламжилсан бөгөөд хариу нь өнөөдөр ирнэ хэмээн мэдээлэв. Квотод багтаагүй, хүмүүсийн хувьд эрүүл мэндийн үзлэг, шалгалтаар тэнцэхгүй иргэдийг дараагийн ээлжийн хүмүүсээр нөхөх боломжтой хэмээн найдаж буй. Гэсэн хэдий ч энэ асуудлыг өнөө жилийн хувьд төдийлөн анхаарсангүй. Иргэдийн хүсэлт төдийхнөөр хязгаарлан тодорхойгүй байдалтай үлдээжээ. ГАХИТ-ийн удирдлагуудын хэлснээр "Урьд хожид тохиолдоогүй явдал болж хамгийн доод тал нь 144 оноотой хүн Өмнөд Солонгосын ажил олгогчдын тогтоосон квотод арай ядан ороод байгаа" юм.

Иргэдийн хэлний мэдлэг үнэхээр сайн  байсан уу. Эсвэл зальдсан уу гэдгийг одоохондоо хэн ч хэлж чадахгүй байгаа. ГАХИТ-өөс энэ асуудлыг гэрч баримт нотолгоотой нь гомдол саналаа гаргавал хуулийн байгууллагаар шалгуулах бүрэн боломжтой хэмээж байна. Харин хэлний шалгалтаа өгсөн иргэдийн Өмнөд Солонгост хөдөлмөрийн гэрээгээр ажиллах эсэх нь эрүүл мэндийн таван шинжилгээ, 13 үзлэгт хамрагдсаны эцэст гарна. "Өмнөд Солонгосын ажил олгогчдын захиалгаар ажиллаж, зохион байгуулалтад оролцож буйгаас өөр нарийн ширийнийг мэдэхгүй хэмээдэг Гадаадад ажиллах хүч илгээх төвийнхөн ойрын өдрүүдэд эрүүл мэндийн үзлэг зохион байгуулаад тун завгүй байна.

Иргэд эрүүл мэндийн үзлэгт хамрагдахын өмнө ГАХИТ-өөс хэлний шалгалтад тэнцсэнийг нотлох сертификат, үзлэгт орох өдрийн хуваарь болон эрүүл мэндийн үзлэгт хамрагдах иргэнтэй байгуулах гэрээ гэгчийг авч байгаа ажээ. Хуваарь олгож буй "Хэл иргэншил" дээд сургуулийн байранд очиж сонирхоход иргэд "Хуваарийн дагуу дугаарлан холбогдох материалуудаа саадгүй авч байна" гэцгээж байлаа. Харахад саадгүй байгаа нь ажиглагдаж байсан ч ГАХИТ-ийн мэргэжилтнүүдийн иргэддээ үйлчилж буй байдал анхаарал татаж байв. Тэд иргэдийг нэрээр нь дуудан ийшээ, тийшээ хэмээн зандарч гарт байгаа цаасыг нь угзран авах ажээ. Зохих дүрэм, журмын дагуу шалгалт үзлэгтээ хамрагдаад, хураамжаа төлж буй хүмүүст ийн хандах нь тун зохимжгүй харагдаж байсан.

Эрүүл мэндийн үзлэг, шинжилгээг ХӨСҮТ-д үдээс өмнө авч байх хуваарьтай аж. Хуваарь олголт эхэлсэн 27-ны өдөр 1000 орчим иргэн, эрүүл мэндийн үзлэгт хамрагдах гэрээ байгуулан хуваарь, сертификат авсан. Тэдний 200 орчим нь өчигдөр эрүүл мэндийн үзлэгт хамрагдаж, шинжилгээгээ өгсөн байна. Мөн өчигдөр, өнөөдөр тус бүр 1000, гурван өдөрт нийт 3000 иргэнд хуваарь олгосноор, эрүүл мэндийн үзлэгт хамрагдаж Солонгост ажиллах эрхээ олж авах юм. ХӨСҮТ-ийн эмч нараас үзлэг хэр явагдаж байгаа, иргэдийн эрүүл мэндийн байдал хэр байгаа талаар лавлахад "Үүрэгт ажлаа гүйцэтгэж байна. Ерөнхий шинжилгээнүүдээ авч байгаа.

Шинжилгээний хариу гарах хараахан болоогүй. Мэдээллийг зохион байгуулж буй ГАХИТ-өөс авсан нь дээр" хэмээх хариултыг өгсөн юм. Дашрамд дурьдахад ГАХИТ-ийн ажилтнууд өдөр бүр тус эмнэлэг дээр ирж үзлэгийн байдалтай танилцдаг ажээ. Энэ талаар ГАХИТ-ийн Бүртгэл, мэдээллийн албаны мэргэжилтэн Б.Цогбаяраас лавлахад:

"Эрүүл мэндийн үзлэг, шинжилгээг Халдварт өвчин судлалын үндэсний төв дээр өнөөдрөөс хийж эхэллээ. Үзлэг ямар нэг хүндрэлгүй журмын дагуу явагдаж байна. Эрүүл мэндийн үзлэгт өдөртөө 200-250 хүнийг хамруулахаар төлөвлөж хуваарь гаргасан. Үзлэг, шинжилгээ 10-аад хоног үргэлжлэх байх. Гэхдээ шинжилгээний хариу тэр дороо гарахгүй. Хэд хоног хүлээгдэнэ" гэсэн юм