Би дундаж амьдралтай айлын охин. Гайгүй сургууль төгсөөд, боломжийн ажил хийж яваа эмэгтэй. Гурван жилийн өмнөөс хамт ажилладаг залуутайгаа дотносож, одоо хамт амьдарч байгаа. Тэр эхнэр, хүүхэдтэй ч надгүйгээр амьдарч чадахгүй гэж уйлж, гуйгаад ирдэг байсан. Би түүнээс салах гэж оролдсон ч дийлээгүй.

 

“Чи. эхнэрээ их зовоосон. Хүний зовлонгоор жаргал хиймээргүй байна. Чи бид хоёр сайхан амьдрахгүй” гэж олон хэлсэн дээ. Салах гэж хэчнээн оролдсон ч нэг дор ажилладаг болохоор байнга тааралдана, нөгөө хүн маань удирдах албан тушаалтан болохоор айхгүй ч гэсэн аягүй гэж. Байнга архи ууж, эхнэртэйгээ хэрүүл хийж, тун муухай харилцдаг байсан юм шиг байна лээ.

Эхнэр нь аргаа бараад хувцасыг нь өгөөд явуулчихсан байсан. Мэдээж бүх бурууг тэр хүнд тохох гээгүй. Хүн гуйгаад, үгүй бол үхнэ гээд байхаар нь аргагүй байдалд орж, нөгөөтэйгүүр сайхан амьдрах ч юм бил үү гэж найдсан. Тэгээд л юм юм нь бүрдээд, хамтдаа амьдрах болсон.

Манайх ам бүл цөөн, дүү маань бие муутай. Эхэндээ ээж, аав “хүргэн хүү” гээд сүйд байсан. Гэтэл үе үе согтуу ирж, агсан тавьж, бүр надад гар хүрэх болсон. Би уурлаад хөөнө. “Чамаас болж миний амьдрал ийм болсон байхад …”  гээд дайрна. Эрүүл болохоороо уучлалт гуйгаад л. Эцэг эх маань миний аяыг хараад, энэ хүнийг загнаж зандарч сүйд болдоггүй юм.

Нэг хэсэг сайхан байснаа манай гэрийнхэнтэй муудалцаад, бид хоёр тусдаа амьдрах боллоо. Эхэндээ сайхан л байсан. Харин гэрийнхэнтэйгээ холбоо барьж болохгүй, дугаараа соль, таг чимээгүй алга болчих гэх мэтээр ятгаж, далайлгах болсон. Гэтэл дахиад л архи ууж, агсан тавьж, бүр эрүү шүүдэг боллоо. Хутга бариад “ална” гэж занана, байнгын айдас, түгшүүр, дарамтаас болж тайван байхаа больсон.

Сэтгэл мэдрэлийн өвчтэй болж байх шиг байна. Муудалцах бүртээ би гэр лүүгээ гүйгээд, тэр гуйж ирээд, буцаж нийлээд л явсаар байтал багагүй хугацаа өнгөрч. Намайг элдэвлээд зогсохгүй гэр бүлийхнийг маань доромжилж, байнга муудалцах болсон.

Би боломжийн алба хашдаг, хаа ч гологдохооргүй боловсролтой хүн ч амьдралаас үнэндээ залхаж байна. Нэгэнт шигдсэн лаг шавраасаа сугарч чаддаггүй, гэрийнхэнийг маань муу зүйл хийх вий гэж гэж айж байна. Олон хүн намайг хүнийг эхнэрээс нь салгаж суусан, хохь нь гэх байх. Гэвч тэр хүн судсаа ханаж, элдэв зан гаргасаар намайг гарцаагүй байдалд оруулсан гэхэд хилсдэхгүй.

Сэтгэл мэдрэлийн өвчтэй юм болов уу. Одоо бол эхнэр хүүтэйгээ уулзаад ирэх болгондоо намайг харааж, загнаад л.  Үнэндээ хүнээр хайрлуулах гэсэн хүслээс минь болоод ийм хачин зүйл болчихлоо. Энэ бүхнийг хаяад, хол явж болох ч мөнгө төгрөгөөс эхлээд гэртээ санаа зовоод яаж ч чадахгүй юм. Энэ бүх лайг гэртээ авчирсан би буруутай. Надад ажил, мэргэжил, байр орон гээд тайван амьдрахад хэрэгтэй бүхэн байна. Харамсалтай нь, энэ хүнээс болоод бүх зүйл урвуугаараа эргэчихлээ.

Би яавал дээр вэ, хаана, хэнд хандах вэ?  

Захидлын хариуд сэтгэлзүйч зөвлөлөө

Нэгэнт та хоёр хамтдаа амьдраад багагүй хугацаа өнгөрч. Тиймээс яагаад хамт байх болсон, та хоёрын харилцаа яагаад ийм байгаа, буруутан нь хэн бэ гэдэг нь одоо чухал биш. Тэгээд ч яг тэр нь буруу гээд хэлчих юм алга. Тиймээс асуудалд ухаалгаар хандан, хэтээ бодон, сэтгэл санаагаар уналгүй энэ давааг амархан даван гарч болно. Ингэхийн тулд урд тань юу хүлээж байгааг сайн төсөөлсөн байх ёстой.

Өөрийгөө бэлтгэсэнээр урам зориг төрөх болно. Та аз жаргал хүссэн болохоос биш салаж ч болдоггүй нийлж ч болдоггүй ийм амьдрал хүсээгүй нь лавтай. Тиймээс нэн түрүүн хамт амьдарч байгаа хүндээ бодож байгаа зүйлээ хэлээд үз. Таны хэлж байгаа шиг дураараа, бүдүүлэг, ухаан муутай хүн бол шууд хэлэх хэрэггүй. Болгоомжтой, тойруугаар ойлгуулах гээд үзээрэй. Захидалаас тань салахаар шийдсэн байна гэж ойлголоо.

Салалтын хамгийн том алдаа нь хосууд яг байгаа асуудлаа байгаагаар нь харахыг хүсдэггүй тэрнийхээ оронд бие биенээсээ бурууг хайж маргадаг. Хэн нь буруутайг нотлож буруутай нэгнээ шийтгэж өшөөгөө авахыг хүсдэг. Үнэндээ бүх юм өнгөрсөн байхад хэн нь буруутай байх нь хамаагүй шүү дээ.

Хэрвээ та салмаар байгаа бол

1.Эрх чөлөөтэй дураараа бай Энэ нь санхүүгийн тал дээр ч сэтгэл зүйн тал нь аль альнаар чөлөөтэй түүнээс хамааралгүй болохыг хэлнэ. Танилынхаа хүрээг тэлж удаан холбоогүй байсан найз нөхөдтэйгээ уулзах. Магадгүй ямар ч урилганд зөвшөөрч, бүр ажлаа ч сольж болно. Хамгийн гол нь түүнээс хамааралгүй гэдгээ нотлох нь чухал. 

2.Дотно холбоогоо аажмаар тасал Та хоёрын дунд дасал болсон дотно холбоогоо таслах хэрэгтэй. Бие биенийхээ сонирхол амьдралын хэв маягт нь бүү оролц. Хамгийн гол нь эрс биш аажмаар шүү. Таны зорилог бол өөрийнхөө амьдарлаар амьдарч сурахад оршиж байгаа.

3.Хэзээ ч битгий шууд шүүмжил Тэр 100 хувь бурутай байсан ч уурлаж, хашигчиж, шүүмжлэх хэрэггүй. Зүгээр дотроо бодоод л өнгөр. Ийм үйлдэл нь түүнийг дорд үзэж  буй мэт санагдуулна.

4.Түүний ноёрхлоос гарах Хэрвээ тэр салахгүй таныг янз бүрээр дарамталж сүрдүүлээд байвал өөдөөс нь хариу үйлдэл хийж тэмцэх хэрэггүй. Нуугдах эсвэл зугтах нь таньд нэмэр болохгүй. Харин эсрэгээр нь түүний амьдарлыг там шиг болгоод үз.

Таны хүйтэн бардам зан нь түүний захирах, авах хүслийг улам бүр бадраана. Тиймээс эсрэгээр хийгээд үз. Танд эдгээр алхамуудыг хийхэд сэтгэлзүйн бэлтгэл байхгүй бол мэргэжлийн хүмүүст хандаж болно. Тэд тантай хамтран боломжтой хувилбаруудыг олж, анзаараагүй бүхнийг хэлж өгөх болно.

Хамгийн гол нь энэ асуудлыг хэн нэгэн, аль нэг тусламжийн байгууллага биш зөвхөн та өөрөө шийдэж чадна гэдгээ ойлгох хэрэгтэй. Гэр бүлийнхнийхээ тухайд айх хэрэггүй.

Гэр бүл тань таны эмзэг газар гэдгийг мэдсэн учраас тэр хүн айлгаж, дарамтлах гэсэндээ элдвийг ярьж, сүрдүүлдэг байх магадлалтай.

Тиймээс түүний олз болж, хэлсэн бүхэнд нь итгэн өөрийгөө барьцаалах хэрэггүй. Асуудал хурцадвал хууль хяналтын байгууллагат хандаж болно.