Хөх толбот  монголчуудын ухаалаг, тэсвэр тэвчээртэйг дэлхийд гайхуулсан  арван нэгхэн настай А.Уранбаярын тухай цуврал сурвалжлагын долоодугаар хэсэг

Малчин монгол айлын хүүхдүүдийн жишгээр хар багаасаа л хурдны морь унаж, моринд хорхойтой болсон А.Уранбаяр ухаалаг өсжээ.

А.Уранбаяр ой модонд 11 хонохдоо араатан амьтнаас өөрийгөө хамгаалж чадсан байна. Чоно дагахад хүү гүйгээгүй, гүйвэл дайрна гээд алхсан хэвээр барьж явсан хазаарынхаа төмрийг дуугарган чимээ гаргасан гэнэ.



 Түүнийг төөрөх үед Монголын зүүн бүс нутагт 39-43 хэмийн халуун өдрүүд үргэлжилж байсан юм. Энэ үеэр Монгол улсад өөр нэг хүн ойд төөрөөд нэг хонохдоо осгож нас барсан. Энэ золгүй тохиолдлын эзэн нь нас биед хүрсэн гадаадын иргэн байлаа.

Харин арван нэгхэн настай А.Уранбаяр хүү өдрийн бүгчим халуунд модны ёроолд унтаж амраад, шөнийн цагаар алхдаг байсан гэнэ. Ундааны сав олж аваад булгийн ус дүүргэн замдаа ууж, толгойгоо норгон наранд цохиулахаас сэргийлж явжээ.

 А.Уранбаяр “Ямар ч байсан гэрээ олно, аав ээж, ах, эгч нартайгаа уулзана” гэсэн итгэлтэйгээр урагшаа алхсаар байсан гэнэ.

 Хүүг алга болсны дараа Баян-Уул суманд  “Сумын зөн билгийн тулаан” маягийн тэмцээн зохион байгуулагдсан  гэдгийг Дорнод аймгийн Баян-Уул сумын иргэд хэлж байлаа. 

Араатан шувууны хоол болж нас барчихсан гэх нэгэн байхад амьд сэрүүн байгаа, нэг л өдөр гэртээ ирнэ гэж хэлсэн лам, бөө ч байсан гэнэ. А.Уранбаярын найз А.Соёл-Эрдэнэ хүү “Миний найзыг үхчихсэн байна” гэж олон лам худлаа хэлсэн хэмээн уйлж байлаа.   “Амьд хүн аргатай” гэж монголчууд ярьдаг.

 А.Уранбаяр хүүд малчны уламжлалт орчин, малчин хүний байгаль дэлхий, цаг ууртай харьцах арга ухааныг аав, ээж, өвөөгөөсөө сонсож өссөн нь нөлөөлсөн гэж хэлж болох юм.