Дэлхийн аваргын 41 дэх тоглолт болох Словак болон Италийн шигшээ багуудын тоглолт Johannesburg хотын Elis Park цэнгэлдэх хүрээлэнд 6 сарын 24–ны 22:00 цагаас болж Словакийн шигшээ багийн ялалтаар өндөрлөлөө.
Италийн шигшээ багийн хувьд хэсэгтээ 2 оноотой байгаа ба тэнцэх эсвэл ялалт байгуулж байж хэсгээсээ гарах хүндхэн байдалд байгаа юм. Харин Словакийн шигшээ багийн хувьд хэсэгтээ 1 оноотой хамгийн сүүлийн байранд явж байгаа ба тэд энэ тоглолтонд ялалт байгуулвал хэсгийн нөгөө 2 багийн тоглолтоос хамааран хэсгээсээ гарах эсэх нь шийдэгдэх юм. Хэсгийн нөгөө нэг тоглолт болох Шинэ Зиланд, Парагвайн шигшээ багуудын тоглолтоос тэдэнд Парагвайн шигшээ багийн ялалт л хэрэгтэй байсан юм.
Словакчууд Италийн шигшээ багын эсрэг 4-4-2 гэсэн байрлалаар тоглож байгаа ба Италийн шигшээ багийн хувьд мөн 4-4-2 гэсэн байрлалтайгаар Vincenzo Iaquinta, Antonio Di Natale гэсэн 2 довтлогчтойгоор Словакийн шигшээ багийн эсрэг гарч ирсэн.
Тоглолтын эхний үе эхлээд хамгийн эхнийн аюултай довтолгоог Италийн шигшээ багийн довтлогч Vincenzo Iaquinta тоглолтын 4 дэх минутанд гүйцэтгэсэн ч хаалгатай нэлээд зайтай өнгөрсөн. Тоглолтын эхний үед Словакчууд бөмбөгийг илүүтэй эзэмшиж байсан ба энэ ч тэдэнд тус болж тоглолтын 25 дахь минутанд Словакийн шигшээ багийн 11 дугаартай Robert Vittek Италийн хамгаалагчдын алдааг ашиглан гоол оруулснаар тоглолтыг Словакчууд “1-0”-р тэргүүлж эхлэсэн. Мөн эхний үеийн нэмэлт минутанд Словакийн шигшээ багийн 19 дугаартай Juraj Kucka хаалгаруу маш хүчтэй цохилтыг хийсэн нь хаалгатай маш ойрхон өнгөрч Италичуудыг дахин нэг айлгаад авсан. Ингэснээр тоглолтын эхний үе Словакийн шигшээ багийн давамгайллаар өндөрлөсөн.
Италийн шигшээ багийн хувьд 2 дугаар үед довтолгоондоо илүү анхааран, сэргэн гарч ирэх шаардлагтай байсан.
Тоглолтын 2 дугаар үе эхлээд Италичууд довтолгооны урд хэсэгт Fabio Quagliarella гаргаж ирэн урдаа 3 довтлогчтой болсон ба төд удалгүй шилдэг хагас хамгаалагч Andrea Pirlo-г талбайд гаргаж ирсэн. Тоглолтын 67 дахь минутанд Италийн шигшээ багийн довтлогч Quagliarella их аюултай цохилтыг гүйцэтгэсэн ч хаалганы цагаан шугаман дээр зогсож байсан Словакийн шигшээ багийн Skrtel-ийн өвдгөнд ойн гарсан. Төд удалгүй тоглолтын эхний гоолыг хийсэн Robert Vittek баруун жигүүрээс өгсөн дамжуулалтыг гоол болгосноор Словакчууд тоглолтыг “2-0”-р хошуучилж эхлэсэн. Ингэснээр Италичуудад дахин 2 гоол оруулж байж ядаж тэнцээ авах шаардлагатай болсон. Италичууд довтолгоогоо ширүүсгэж тоглолтын 81 дэх минутанд довтлогч Antonio Di Natale гоол оруулснаар тоглолтын тооны харьцааг “2-1” болгож Италичууд бага ч гэсэн найдвар бий болсон. Гэсэн хэдий ч Словакчууд уг гоолын хариуг барьж 20 дугаартай Kamil Kopunek гоол оруулснаар дахин тооны зөрүүг 2 болгож холдуулсан. Италичууд маш хүнд байдалд орсон ба энэ гоолын хариуг тэр дорно барин довтлогч Quagliarella гоол оруулан тооны харьцааг “3-2” болгож ойртуулсан.
Гэсэн хэдий ч дэлхийн 4 удаагийн аварга Италичууд дахин гоол оруулж чадалгүй Словакийн шигшээ багт гутамшигтайгаар хожигдон дэлхийн аваргын тэмцээнийг орхиж байна.
