6-р сарын 22-ны өдөр “H” группын 2-р тойргийн хоёр дахь тоглолт болох Испани болон Гондурасын шигшээ багуудын тоглолт Монголын цагаар 02:30 цагт Johannesburg хотын Elis Park цэнгэлдэхэд амжилттай болж Испанийн шигшээ багийн ялалтаар өндөрлөлөө.

Испанийн шигшээ баг 4-4-2 тактикаар тоглогчдоо гаргаж довтолгоондоо Torres, David Villa гэсэн хүчирхэг довтолгооны хослолыг гаргаж ирсэн. Гондурасын хувьд мөн 4-4-2 гэсэн тактикаар тоглогчдоо гаргасан байгаа.

Тоглолт эхлээд удаагүй байхад буюу тоглолтын 17 дахь минутанд Испаний шигшээ багийн довтлогч David Villa ойролцоогоор 25 метр орчим зайнаас бөмбөгийг тууж орж ирэн Гондурасын 3 нь ч тоглогчийг аргалан тоглолтын эхний гоолыг оруулсан. Ерөнхийдөө эхний үед Испаний хувьд туршлага зааж бөмбөгийг илүүтэй эзэмшиж , довтолгоог ч илүү зохион байгуулж байсан ч Villa-н гоолоос өөр гоол эхний хагаст ороогүй.

Тоглолтын 2 дугаар үед Гондурасчууд довтолгоондоо анхаарч, эхний үед төдийлөн харагдаагүй довтлогч Espinoze-ын оронд довтлогч Welcome-ыг оруулж ирсэн юм. Гэсэн ч 2 дугаар үе мөн л Испаний давамгайлал доор өрнөж эхэлсэн. Тоглолтын 2 дугаар үеийн 51 дэх минутанд эхний гоолын эзэн David Villa 16-ын гаднаас хүчтэй цохилтоор гоол хийн өөрийн болон тоглолтын 2 дахь гоолыг оруулж тоглолтын тооны харьцааг 2:0 болгосон юм. Мөн тоглолтын 61 дэх минутанд Гондурасын шигшээ багийн хамгаалагч Emilio Izaguirre өөрийн 16 дотор Jesus Navas дээр алдаа хийж шүүгч Испанид торгуулийн цохилтыг цохих эрх өгсөн. Энэ цохилтыг David Villa гүйцэтгэсэн боловч гоол оруулж чадаагүй, ингэснээр тэр өөрийн хеттрик хийх сайхан боломжоо алдсан. Үүнээс хойш хоёрдугаар хагаст өөр гоол орохгүй байсаар 2:0-ээр буюу Испанийн шигшээ багийн ялалтаар өндөрлөсөн юм.

Ийнхүү Испаний шигшээ багийн хувьд энэ ДАШТ-ний анхны хожлоо авлаа. Тэдний дараагийн учраа бол хэсгээ 6 оноогоор тэргүүлж байгаа Чилийн шигшээ баг. Энэ тоглолт тэднийг хэсгээсээ гарах эсэхийг шийдэх чухал тоглолт байх болно. Гондурасын шигшээ багийн хувьд 2 хожигдолтой болсноор хэсгээсээ гарах бараг боломжгүй болж байна.