Би 32 настай эмэгтэй. Нөхөртэй, 2 хүүтэй. Бид 2 оюутан байхдаа нэг ангид байж, төгсөөд нийлж, анхны хүүгээ гаргаж, одоо хамт амьдраад 10 жил болж байна. Амьдрал асуудалгүй байдаггүй бололтой, миний амьдралын гол асуудал бол нөхрийн минь архи уух явдал. Түүнээс бусад юман дээр бид 2 санаа нийлж, сайхан амьдардаг /дундаж амьдралтай/ гэж боддог. Архинаас бусад зүйл дээр бид 2 бараг хэрүүл маргаан хийдэггүй. Би бол нөхрийгөө архичин болчихлоо л гэж бодож шаналж, лам, бөө, эмнэлэг, эмчилгээ, цуглаан гээд л бүх л зүйлийг хийж дуусгалаа. Даанч хэрэг болж байгаа юм алга. Сайн бол 1 сар уухгүй тэвчээд л дахиад л ууж, 1 уухаараа 10-14 хоног зогсохоо мэдэхгүй ууж, сүүлд нь ямар нэгэн арга хэмжээ авч байж л зогсдог. /Дээр хэлсэн/ Санасныг бодоход манай хадмууд гайгүй сайн хүмүүс намайг ойлгож хамтран тэмцдэг. Даанч тэд чинь бас ажил, амьдралтай, сүүлдээ бүр залхдаг бололтой. Би маш олон удаа ажлаа тасалж, сахиж манаж байж эрүүл болгодог байсан, гэвч сүүлдээ надад дийлдэхээ болиод ааш, аягтай болоод байна. Айлгах гэж сална гэж шүүхэд өргөдөл ч өгч үзэж байсан.

Даанч өөрийг нь бодоод, засрах байх гэж бодоод 3 хоноод л өөрийн хүсэлтээр өргөдлөө буцаагаад л авсан. /өөрийнх нь гуйлтаар/ Бид 2 бие биендээ хайртай, анхны хайраараа л учирцгаасан. /Сексийн тал дээрч сайн нийлдэг/ Манай хүнд олон сайн тал бий, мөнгө олдог /сайхан газруудад ажилд орсон боловч архи уугаад ажлаасаа 2 ч удаа гараад, одоо тогтсон ажилгүй, хувийн жаахан компанитай/, намайг хуурдаггүй, гар хүрдэггүй, 2 хүүдээ хайртай, хүнд тусархуу, ямарч хүн манай хүнийг хараад л сайн хүн байх гэдэг. Даанч энэ хар архинаас л болж сүйрч байна. Би найз нөхөдтэйгөө ярьж, янз бүрийн зөвлөгөө сонсож, хэрэгжүүлэх гэж ороддог боловч ерөөсөө болохгүй байна. Агсан тавьдаггүй нь надтай холбоотой гэж боддог, учир нь би согтуу үед нь юу ч дуугардаггүй, бушуухан л унтуулдаг. Бас 1 зүйл нь аав нь архи уудаг байсан, ах нь бас одоо уудаг, тэгэхээр удам дамждаг гэдэг үгийг олон хүн хэлдэг, одоо надад үнэнийг хэлэхэд энэ хүнийг архинаас гарах байх гэж бодогдохгүй байноо.

Би энэ байдалтайгаа эвлэрч насыг барах уу, эсвэл салах уу гэж дандаа бодогддог. Даанч шийдэж чадахгүй юм. Манай гэр, ээж хэдэн дүү нар минь хөдөө байдаг. Энд надад садан төрөл, очих айл ч байдаггүй. Гэхдээ л архичин хүн ямар байдгийг, мэдэх хүмүүс нь мэдэх байх, маш муухай үнэр танар, ломбарданд эд зүйлээ тавих /миний утсыг ч булааж гараад тавьж байсан, бас мөнгөн аяга, бөгж гээд л/, гэмтэж бэртэх гээд л би сахиад наркологийн эмнэлэг болон бусад эмнэлэгт ч хэвтэж байсан, бас 1 хувийн эмчид 1 сая төгрөг өгөөд эмчлүүлж ч үзсэн, даанч нэмэргүй. Ингэж хэтрүүлэн уугаад бараг 7-8 жил болж байна. Уугаагүй үедээ архи уудаг гэж хэлэхээргүй цэмбэгэр залуу бий. Миний багын хүмүүжил сайн, өссөн орчинд архи уудаг хүн байгаагүй болохоор надад их хэцүү байдаг. Хүмүүс намайг их тэвчээртэй, тайван, дуугай л гэдэг, тиймдээ л өдий хүрч байгаа байх. Улсад ажиллаад 8 жил болж байна, адилхан л амьдралын төлөө зүтгэдэг. 2 хүү минь нүдэн дээр том болж байна. /сайн хүүхдүүд бий/ Одоо нээрээ би насан туршдаа ингэж амьдрана гэхээр надад хэцүү санагдаж байнаа. Ийм л асуудалтай хүн байна даа би та бүхнийг зөвлөгөө өгөхийг хүсэе.