Хятадын баруун хэсэгт оршдог Цинхай мужид болсон 6.9 баллын хүчтэй газар хөдлөлтөд сүүлийн мэдээгээр 400 гаруй хүн амь үрэгдсэн нь батлагдаад байна. Голдуу монгол, түвдүүд аж төрдөг Цинхай буюу Хөхнуур мужийн Юшугийн тойрогт болсон газар хөдлөлтөд мужийн Жиэгү хот хамгийн их сүйджээ. Мужийн нийслэл Шининь хотоос баруун өмнөд зүгт 800 км-ийн зайд оршдог Юшу Хятадын хамгийн алслагдмал, хүн ам цөөтэй, хоцрогдсон хөгжилтэй бүс нутгийн нэг аж. Гамшигт арван мянга гаруй гэмтэж бэртжээ. 30 мянга гаруй хүнтэй Жиэгү хотын барилга байшингийн 80 хувь сүйдсэн бөгөөд эмнэлэг, сургууль зэрэг нийтийн олон барилга нуржээ.
Зэргэлдээх мужуудаас нийт 5000 орчим мэргэжилтэн аврах ажиллагаанд тусалж буй бөгөөд хэдэн зуун хүнийг нуранги дороос эсэн мэнд гаргажээ. Гэхдээ бүс нутгийн алслагдмал байдал, муу дэд бүтэц аврах ажиллагааг удаашруулж мэдэхээр байна. Газар хөдлөлтөөс болж эвдэрсэн далан сэтэрч магадгүй гэж эмээсэн хүмүүс ойролцоох өндөрлөг газар, ууланд бүгж буй аж. Нэвтрэхэд хэцүү байгаа ч Хятадын өнцөг булан бүрээс аврагч, эмч нарын баг Цинхайг зорьжээ. Одоогоор зэвсэгт хүчний 700 гаруй албан хаагч аврах ажиллагаанд оролцож буй бөгөөд уг тоо хоногийн дотор мянгаарнэмэгдэх аж. Газар хөдлөлт орон нутгийн цагаар өглөөний 07.49 цагийн орчимд болсон тул хохирогсдын олонхи нь нурангид дараатай байгаа гэж албаныхан ярьжээ. Орон гэргүй болсон хүмүүс өндөрлөг нутгийн хахир хаварт ихэд зүдэрч байгаа аж. Цинхайд одоо өдөрт дунджаар цельсийн +6 хэмтэй байна. Өндөрлөг нутаг газар хөдлөлтөд өртөмтгий бөгөөд АНУ-ын Газарзүйн судалгааны хүрээлэнгээс мэдээлснээр Юшугийн газар хөдлөлт тус бүс нутаг дахь 1976 оноос хойшхи хамгийн хүчтэй газар хөдлөлт аж. Юшугийн тойрогт 250 мянга гаруй түвдүүд аж төрдөг. Шининь, Лхаса хотын дунд оршдог тус бүс Цинхай-Түвдийг холбосон шинэ төмөр замаас 400 км орчим зайд оршдог юм.

2008 онд Цинхайтай хил залгаа Сичуань мужид буюу Юшугаас 800 орчим км-ийн зайд болсон 7.8 баллын хүчтэй газар хөдлөлтөд 87 мянга гаруй хүн нас барж, таван сая гаруй хүн орон гэргүй болсон юм. Дэлхийн хэмжээнд сүүлийн хүчтэй газар хөдлөлт төв Чилид болсон бөгөөд 8.8 баллын хүчтэй тэрхүү газар хөдлөлтөд 450 гаруй хүн амь үрэгдсэн билээ.