Зүрхэн тарнийн уншилга шившиж
Зөн сэргээх хар шөнийг хаанчилья
Зүүн гартаа балын харандаа атгаж
Зүүдэн тэнгэрийн зараалын боол больёо
Гүнгэрваа хоргонд хоригдсон таталбар зургаа сэргээхээр
Гүн амгалан нойрсох чиний урланд нэвтэрлээ
Удаан жил өлгөсөн жаазныхаа тоосыг арчаад
Уруулын будгаар чи өөр бүсгүй зуржээ
Нүүрэн дээр минь нүүр тааруулж
Нүдэн дээр минь нүд давхцуулж
ягаан хүрэн уруулын будгаар
яг өнөөдөр цоо шинэхэн зураг зуржээ
Хааяа хааяа илэрдэг шулмын зан тодорч
Хар шөнийн өнгөнд адын зөн төрлөө
Сармагчин гэж дотроо шивнээд
Салгалсан гараараа сараачиж гарлаа
Халаг минь яасан урт хөл вэ
Харандаа минь дуусчихлаа
Хайран юм яасан богино шөнө вэ
Хаанчилал минь нурчихлаа

I want to
profile
Өөдгүй зантай хүний өөлсөн үгэнд  гомдовч
Өнгө мөнгө дутаж өөрчилж солимоор санагдавч
Өөдрөг эхэлсэн ажлаа үргэлжилүүлж заавал дуусга
Өөрөө өөрийхөө мөрөөдөлөөс урваж битгий амьдар