30 хүртэлх насны арван бүсгүйн бараг ес нь загвар өмсөгч, топ модель хэн шиг гоолиг биетэй болохын тулд динозаврын өндөгнөөс эхлээд акулын төмсөг хүртэл юу ч ууж идэхэд бэлэн байгаа гэвэл нэг их том хэтрүүлэг болохгүй байх. Охид бүсгүйчүүдийн турах гэсэн энэ их хүслээр далимдуулаад таван гурван төгрөг цохихгүй бол нүгэл болно гэсэн бодолтой хүмүүс мундахгүй олон. Тийм ч болохоор эртний миссир, эсвэл атлантидын нууц жороор хийсэн зуун хувийн баталгаатай тураадаг шүүс, жүүс, коопээ, кофе, байхуу, майхуу, цай, май зарна гэсэн зартай булан тойроод л таарч болно. 

Богино хугацаанд найдвартай, зуун хувь тураад тураад байна гэж хэзээ ч байдаггүй. Байлаа ч гоолиг болох донд хэт автаад идэж уух юмнаас хэт татгалзаад ирнэ гэдэг тун удалгүй анагаахын багш оюутнуудын нүдийг хужирлах үзүүлэн болохын ёр гэдгийг мэддэг хүн цөөн байдаг нь харамсалтай.

“Аа худлаа худлаа” гэж маргах гэж байгаа хүмүүс доор байгаа зурагнуудыг нэг хараарай. Эд бол цөм гоолиг болохын төлөө голоо таслаж байгаа гэдгээ ч мэдэхээ байтлаа донтосон хүмүүс. Энэ донг нь анорекси гэдэг. Анорекси гэдэг нь грекээр хоолны дуршил үгүй болох гэсэн утгатай. Энэ дон үүсэх шалтгаан нь тун энгийн. Элдэв гялгар хавтастай сэтгүүл, кино, загварын үзүүлэн зэрэг дээр гардаг шиг гоолиг биетэй болохын төлөө элдэв эм тан, цай май ууж эхлээд, удалгүй хоолоо сойх оддын жор руу хадуурна.

Маш богино хугацаанд их жин хасна гэдэг өндөр төлбөртэй нарийн мэргэжлийн эмчийн хяналтан доор,  түр хугацаанд л хийгүй бол үр дүнгүйн дээр, эрүүл мэндэд муу. Харин чи нөгөө нэг хэний эхнэр алдартай од л биш бол тэгэж их мөнгө төлж чадах нь юу л бол. Ингээд тэрмуу, эсвэл энэмуу чадаад байхад би заавал чадах ёстой, бүр илүү гарч чадна гэсэн богино холбоо тархинд нь үүсээд хамгийн дөхөм аргаар буюу хоолноос санаатайгаар татгалзах замаар жингээ хасаж эхэлнэ.

Нэгэнт тархинд нь богино холбоо үүсчихсэн болохоор цаашдын үйл явц цасан нурангийн зармчаар явна. Эхэндээ өөрийн мэдэлгүй бага зэрэг юм идчихнэ. Дараа нь толинд биеэ хараад яанаа таргаллаа гээд албаар бөөлждөг болно. Тэгснээ биеийн жин нь цааш улам бүр хасагдаж хүсээд байсан гоолиг хэмжээндээ оччихоод байхад толинд харчихаад арай л болоогүй байна гэж бодно. Цаашлаад жаахан юм идсэн ч өөрийн мэдэлгүй бөөлжиж гаргадаг болно. Яваандаа идэх юм бүр идэж чадахаа байна. Албан хүчээр идүүлсэн ч хэт их жин алдаснаас болоод бие махбодь нь шингээж чадахаа байна. Тэгээд тэгээд энэ зураг дээрх шиг “зомби модель” болно. Биеийн жингийнхээ тавиас илүү хувийг энэ мэтээр алдана гэхээр ямар олиг байх вэ. Эвгүйтвэл амиа алдана.

Эдгэрлээ ч насан туршдаа ойролцоох эмийн сан, эмч хоёрын найдвартай үйлчлүүлэгч гэсэн улаан дарцаг авч 5% хөнгөлөлтийг сардаа нэг эдэлдэг болохоос өөр юу ч болохгүй.

Өөртэйгээ адил зомбитой таарахгүй бол хүн тоохгүй. Таарлаа гэхэд зөөлөн салхи үлээхээр хийсчих гээд, шиврээ бороод орохоор дусалд нь цохиулж үхэх гээд гадуур гарч чадахгүй. Тэжээлийн бодисын хүчтэй дутагдлаас болоод бэлгийн дур хүсэл, хүүхэд гаргах чадвар хоёр нь алга болно. Мессенжэрт ороод “Hi” гэж бичихэд л хамаг хөлс нь цутгаад амьсгаадаад байдаг болно.

Турахыг хүсч байгаа охид, бүсгүйчүүд минь ээ, ийм болсноос сайхан махтай шөлтэй, нүүр дүүрэн инээмсэглэж явсан нь дээр шүү. Юмыг яаж мэдэх вэ ийм асуудалтай тулгарсан хүнийг таньдаг бол сэтгэцийн эмнэлэгт хандаж яаралтай үзүүл гэж хэлэхээ мартуузай. Цаадуул чинь хэмжээнд хүрчихээд байгаа атлаа өөрсдийгөө толинд харахаараа ахиад турах хэрэгтэй юм байна гээд байдаг гэж байгаа юм шүү.