Сайн байна уу Ээжээ? Удахгүй ээжүүдийн баяр болох гэж байна. Би хэндээ ч очих билээ. Тийм болохоор таньдаа захиа бичиж сууна. Та минь яваад яг 5 сар болж байна. Юм хэлэлгүй, алтан сургуулиа хайрлалгүй гэнэтийн тохиолдлоор яваад өгсөнд тань охин нь гомдоогүй ээ ээжээ. Бодвол та тэр сайхан бурхны оронд ээж, аав, дүүтэйгээ уулзсан байлгүй дээ.

Таны тэнгэрт хальсан тэр өдөр өчигдөр л юм шиг тод санагдаж байна. Би чихэндээ итгээгүй, таныг диваажингийн орныг зорьсон гэхэд энэ бүхэн зүүд байгаасай гэж хичнээн хүссэн ч жамын юм жамаараа миний амьдралд дэндүү эрт айлчилсан. Ээжээ таныг таалал болсны дараа хүн болгон адилхан санагддаг юм билээ.
Гандан дээр ном уншуулах юмуу энд тэнд явж байхад та минь явж байх юм. Үгүй ээ ээж энд юу хийж яваа юм бол гээд дөхөөд очиход биш л байдаг. Сэтгэл дотор минь бачуурч хоолой зангирч би андуурснаа бас хүний хорвоод торойж үлдсэнээ урсах нулимс, зангирах хоолой, чичрэх зүрхтэйгээ хамт мэдэрсэн. Гомдож, туних, сэтгэлээр ядрах, өвдөхдөө таныгаа бүр их санаж байнаа. Алдаж, гэнэдэж, уруудаж, буруудаж явахад минь ээж минь та л уучилдаг. үрээ гэсэн сэтгэлээр та бүгдийг уучилж, зааж зааварлан энэ амьдралын хүнд ноогдох бүхий л баяр баясгалан, зовлон гуниг, үүрэг хариуцлага, өөртөйгөө адилхан эх хүн болох хамгийн гайхалтай зүйлийг бэлэглэн хүн болгон төрүүлж өсгөж хүмүүжүүлсэн билээ.

Сэтгэл дотор таныг гэсэн орон зай онгойсоор л байна. Хэзээ ч битүүрэхгүй бизээ.

Ээжээ би таныхаа амарыг хүмүүний нарт ертөнцөөс эрин мэндчилж байна. Харин миний байгаа газар таны байгаа диваажингаас хэр зайтайг  мэдэхгүй байнаа. Миний байгаа газар өвөл болж цас их орж байна. Ээжээ таны байгаа газар цас ордог уу? Цас, бороо орохоор сэтгэлд минь таныгаа бодох бодлын хэлхээ улам бүр хэлхэгддэгээ. Заримдаа та надад ойр байгаа нь мэдрэгддэг. Яагаад гэвэл ямар нэгэн юм болохоо байхад та үргэлж надад тусалдаг юм шиг мэдрэмж төрдөг. Энэ мэдрэмжиндээ би итгэдэгээ ээжээ. Таныг байхад сайхан байж дээ. Хорвоо нэг л гоё солонгын өнгөтэй. Ээжээ та санадаг уу намайг бага байхад халуурч өвдөхөд ээжийнхээ өвөрт унт халууныг нь авъя гэдэгсэн. Ээжийнхээ элгэнд тэврүүлээд хэвтэх тэр агшин хэзээ ч дахиж ирэхгүй дээ. Харин би таныгаа халуурч бүлээрхэд элгэндээ нэг болов удаа тэвэрсэн билүү дээ.

Харуусал гэдэл оройтол. Дараа нь ингэж амаа битгий бариарай, Одоо л амьдад нь хайрлаж, баярлуулаарай гэж найзууддаа би хэлдэгээ. Таныгаа гомдоож явсан бол уучлаарай гэж би сэтгэлдээ шивнэдэг. Гэхдээ та минь надад хэзээ ч гомдож байгаагүй ээ. Үрээ гэсэн гэгээн, агуу бурхан сэтгэл таниас л гардаг шүү дээ ЭЭЖЭЭ.
Ээж минь та бидэндээ болоод энгүүн нэгэн ард түмэндээ ариун гэгээлэг үйлсээрээ буян болж нарт хорвоогийн тоосыг хөдөлгөж явах заяа хайрлаж эмчилж, сувилж явсан алдар хүндтэй ачтан билээ.

Таны   цагаан халадтайгаа ажилаа хийж явсан баяр хөөртэй төрх, үр хүүхэд ач зээ нартайгаа бужигнаж суусан тэр л дүр сэтгэлд минь хоногшиж үлджээ.

Хүмүүс намайг эжийтэйгээ  адилхан болж байна гэдэг. Би их баярладагаа. Нээрээ ч  адилхан юм шиг. Таныг явсанаас хойш ээжийн тухай дуу, шүлэг сонсох тоолонд, мөн таньтай холбоотой ямар нэгэн баяр болохоор “уйлчих” гээд байдаг шүү. Гэхдээ би диваажин бий, хойд насны амьдрал бий гэдэгт итгэж явдагаа.

Танаас хойш би өөрөө өөртөө ээж болж явна даа. Гэхдээ таныг гүйцэхгүй юмаа. Хичээж л байна охин чинь. Санаа битгий зовоорой. Нартад намайг төрүүлсэн ээж минь. Санаж байна таныгаа. Үгүйлж байна таныгаа. Зүүдэндээ таньтай учирдаг шүү. Нэг ч болов үнсүүлэхсэн дээ таньдаа.

Ээжээ та энэ хорвоод хүү болон мэндэлсэн байна гэсээн. Жирийн амьдралтай айлд эрүүл энх өсөн торниж байна гэсэн шүү. Тийм болохоор ээжээ зөн совин учрал гэж байдаг бол таны тэр хойд дүрийг чинь нэг хараад сэтгэлээ амраах юмсан.

Ээжээ би таньдаа зориулж гоё юм бүтээх юмсан гэж мөрөөддөг. Тэр юу вэ гэвэл би таньдаа зориулж дуун суварга бүтээх юмсан гэж бодож явна. Үүний төлөө зүтгэнэ ээ. Үүнийг би хийж чадвал таньдаа дуулгана аа.

Ээж минь та олонтой явсан
Ээж минь та охидтой явсан
Ээж минь та сүү шиг ариун сэтгэлтэй явсан
Ээж минь та хийморьтой, энэрэлтэй явсан
Ээж минь та бурууд хатуу, зөвд зөөлөн явсан
Ээж минь та талын Монгол шигээ агуу явсан шүү
Миний бурхан эжий
Хорвоогийн бүх ээжүүд урт насалж удаан жаргах болтугай