Хэдхэн сарын дараа хөлбөмбөгийн их баяр наадамд Өмнөд Африкт нээлтээ хийх гэж байна. Таван тивийн хөлбөмбөг сонирхогчдийг бүх л бүтэн дөрвөн жил хүлээлгэдэг болохоор ДАШТ бол бусад ямар ч тэмцээнээс илүү нэр хүндтэй, чансаатай болдог юм. Тийм ч учраас энэ тэмцээнд оролцолгүй өнжинө гэдэг ямар ч хөлбөмбөгчний хувьд харамсалтай байх нь ойлгомжтой. Ингээд та бүхэнд Өмнөд Африк руу зорчихгүй байж магадгүй 10 шилдэг хөлбөмбөгчдийг танилцуулья.

Пепе (Португал)

Өнгөрсөн 12 сард Валенситэй хийсэн тоглолтонд баруун өвдөгнийхөө зөөлөн эдээ бэртээж улирал дуустал тоглож чадахгүй болсон. Өнгөрсөн жил байсан бол ч яахав эргэж ирээд дараагийн улиралдаа бэлдэх байсан. Харин энэ жил дөрвөн жилд ганц болдог Дэлхийн аваргатай учраас ”хөөрхий” Пепе хэцүүхэн байдалд ороод байна. Ямар сайндаа ”Би бүрмөсөн сүйрлээ” гэж мэдэгдэж байхав. Өдгөө 27 настай түүнийг дөрвөн жилийн дараа ДАШТ-д авч явах ч юм билүү, хэн мэдэх билээ дээ. Тийм ч учраас амьдралд ганц олдох энэ боломжийг алдахад түүнд үнэхээр харамсалтай байгаа нь ойлгомжтой. Дээрээс нь Португалын шигшээд ч түүний орон зай дутагдах болно. Хагасуудаараа ”чирүүлдэг” Португалын шигшээд яг одоо найдвартай лидерийн шинжтэй хамгаалагч алга. Харьж яваа Мигель, Дуда, Ферэйрагийн хэн нь ч одоогоор өндөр түвшний тоглолт үзүүлэхгүй байгаа. Тиймээс Карлош Куйрошт хийх зүйл их байна даа байна.

Раул (Испани)

Ууг нь Раулыг өнгөрсөн Европын аваргаар л Луйс Арагонес дуудчихсан бол мань эр санаа амар зодог тайлах байсан юм. Гэтэл Испаний шигшээ багийн бүх цаг үеийн мэргэн бууч маань одоо олон улсын хэмжээнд ганц ч цомгүй их спортоо орхих дээрээ тулаад байна. Дель Боске Арагонесийг бодвол юманд уян хатан ханддаг болохоор түүнд сүүлийн боломжыг олгож ч мэдэш. Торрес, Вилья байхад гараанд гарна ч гэж юу байхав. Гэхдээ Испаний төлөө хийсэн бүхнийг нь үнэлж Өмнөд Африк авч явах бүрэлдэхүүндээ Раулыг багтаавал Боскег нэг их шүүмжлээд байх хүн гарахгүй л болов уу. Испаничууд ДАШТ-д түрүүлэх хамгийн боломжтой багаар нэрлэгдэж байгааг ч хэлэх үү.

Себастьян Фрэй (Франц)

Раймон Доменегийн хамгийн гол алдаа бол Фрэйг үнэлдэггүй явдал. Мань эр Италийн Сери А лигийн тоглолт үздэггүй юм уу, аль эсвэл түүнтэй өшөөтэй юм уу бүү мэд. Калчио лигт Фрэй Фиорентинагийн хаалгыг сүүлийн 4 жил нэр төртэй манасаар байгаа.
Гэвч Домене зөрүүд зандаа хөтлөгдөн Уго Льорисийг түүнээс илүүд үзэж авьяаслаг хаалгачыг ”гомдоож” орхисон. Он гарахаас өмнө Фрэй саяхан шигшээ багаасаа зодог тайлж байгаагаа зарласан байгаа. Тьерри Анригийн ”гарны” ачаар ДАШТ-д шалгарсан Азарган тахианууд ДАШТ-д төдийлөн амжилттай өрсөлдөхгүй л болов уу. Яагаад гэдгийг зөвхөн зөвхөн Испаний шигшээд 2 : 0-ээр ялагдсан тоглолтоор тайлбарлаж болохгүй л дээ. Гэхдээ л энэ тоглолт тэдний үнэн нүүр царайг бага ч гэсэн харуулаад өгсөн. Хэцүүхэн л харагдаж байна даа, Домене !

Эшли Коул (Англи) 

Нэг бүдэрвэл долоо бүдэрнэ гэгч л Английн шигшээд тохиолдоод байна. Уэйн Бриж Территэй дахин нүүр тулахгүй хэмээн ”гоморхож” шигшээ багаасаа зодог тайлаад удаагүй байхад Эшли Коул бас шагайгаа бэртээгээд гэмтлийн эмнэлэг рүү ”’хүргэгдсэн”. Ядаж байхад энэ хоёр тоглогч нэг байрлалд тоглодгийг ч хэлэх үү Фабио Капелло ”жинхэнэ үсээ зулгааж үгээ барж байна”. Өнгөрсөн сарын эхээр Эшли Эвертоны эсрэг хийсэн тоглолтонд зүүн хөлийн шагайны ясаа цуулж 3 сар хөлбөмбөг тоглож чадахгүй болоод байгаа. 5 сар гээд эргээд ирсэн ч гэсэн ДАШТ хүртэл формондоо орж чадах эсэх нь эргэлзээтэй.
Үүнээс гадна найзынхаа бүсгүйг оролдож байгаад гардуулсан Терри сэтгэл санааны хүндхэн байдалтай байгаа. Энэ нь түүний тоглолтонд нөлөөлж байгааг бид бүхэн харсан. Гэхдээ ДАШТ хүртэл бас ч гэж зай байна аа.

Антонио Кассано (Итали)

”Адсага” aaшт Кассаног 2008 оноос хойш Липпи нэг ч тоглолтонд дуудаагүй байгаа. Цаашид ч дасгалжуулагчтайгаа хэл амаа ололцож чадахгүй бол эх орныхоо төлөө 15 тоглолтонд оролцсон дүнтэйгээр зодог тайлж магадгүй л байна. Анх гарч ирж байхад нь түүнээс Тифоси нар их зүйлийг хүлээж байсан. Гэвч оддын өвчинд хэт их нэрвэгдэж хүний үгийг сонсохоо больсон тул очсон газар болгондоо ад үзэгдсээр эцэст нь ийнхүү эмгэнэлтэй хувь заяатай нүүр тулаад байна. Сампдориад овоо хөлөө олоод гоолдоод байсан ч саяхнаас эргээд л банз халаах боллоо. Адриан Муту торуультай тоглохгүй байхад хүртэл түүнийг гаргахгүй байгаа нь ”нэг л” учиртай.

Кларен Зеедорф (Голланд)

Клубын хэмжээнд авч болох бүх шагналыг хамсан ч Зеедорф шигшээ багтайгаа цом шагнал хүртэж байсангүй. Хамгийн сүүлд тэрээр 2008 оны ЕАШТ-д оролцох боломжтой байсан ч Ван Бастентэй таарамжгүй байсан тул өөрийнхөө хүсэлтээр тэмцээнийг өнжсөн. (2006 онд ч бас тэгсэн). Одоо түүний байран дээр Шнайдер, Ван дер Ваарт гээд авьяаслаг залуус бужигнуулж байгаа болохоор Африк руу явсан ”жуулчны” журмаар л явах нь ойлгомжтой.
34 нас хүрч яваа ч Зеедорф ямар ч байсан гандан бууралгүй МанЮ-гийн хаалганд гоолдохтойгоо л байгаа.

Хуан Роман Рикельме (Аргентин) 

ДАШТ-ий сонгон шалгаруулалтын үеэр Марадона Рикельметэй муудалцаагүй бол цагаан цэнхэрүүд эцсийн мөчид эрхээ авах дээрээ тулахгүй л байсан байх. Рикельмегийн тоглолтыг удирдах чадвар, дадлага туршлага, мэдрэмж Аргентинчуудад зайлшгүй хэрэгтэй гэдгийг хүн болгон л тэр үед хэлж байсан. . Гэвч Марадона эцсийн шийдвэрийг гаргадаг болохоор яая гэхэвдээ. Рикельмег зодог тайлсны дараа Мара ”Би түүнийг гуйсан ч дахиж бүрэлдэхүүндээ багтаахгүй’ хэмээн зарласан. Тэгэхээр эцсийн эцэст Бээжингийн олимпийн алтан медаль л түүний Аргентиний төлөө хийсэн бүхний шагнал болж үлдэх шивдээ.

Роналдо (Бразил)

Роналдод шигшээ багийнх нь хаалга нээлттэй гэж Дунга мэдэгдсэн. Гагцхүү өөрөөс нь л одоо бүх зүйл шалтгаалах болоод байна. Ер нь түүнийг энэ тэмцээнд харахыг хүсэж байгаа фенүүд зөвхөн Бразилаар дуусахгүй л болов уу. Нэг хэсэг жинд нэмээд ”миарч” байснаа бодвол Роналдо одоо хөлбөмбөгч ”төрхөндөө” орчихсон Коринтианст бужигнуулж явна. ДАШТ-аас өмнө бэртэл гэмтэл (түй түй) -д орооцолдчихгүй л бол цаанаасаа ”төрцөн” тоглогч болохоор Бразилийн АШТ-д багаа өлхөөн түрүүлүүлчих авьяас түүнд бий. ДАШТ-ий түүхэнд хамгийн олон гоол оруулсан ”Шүдэрхэг”-тэй халуун Африкт уулзахдаа бид баяртай байх болно.

Алессандро Неста (Итали)

2006 оны ДАШТ-ий дараа Неста клуб, шигшээд зэрэг тоглох ачааллыг даахгүй нь хэмээн зодог тайлж байсан. Үнэн хэрэгтээ хүсэж мөрөөдөж байсан цомоо хүртсэндээ сэтгэл нь ханасан хэрэг гэж ойлгож болно. Тэрнээс биш Итали хамгаалчдын хувьд 30 нас гэдэг ид гялалзаж явдаг үе шүү дээ. Одоо ч гэсэн Нестагийн хүчирхэг хамгаалалт, гайхалтай тоглолт харих болоогүй л байгаа. Гагцхүү бэртэл гэмтэл хэмээх тамирчдын гол дайсан түүний карьерийг сүүлийн хэдэн жил сүйтгэж байна. Хамгийн сүүлд авсан мэдээллээр Липпи түүнийг эргэн ирэхийг урьсан ч өөрөө татгалзсан хариу өгсөн гэнэ лээ.

Роналдиньо (Бразил)

Ронни энэ улирлаас ”дахин төрөөд” байгаа. Одоогоор Сери А лигт 12 гоол оруулснаас гадна гоолын дамжуулалтаараа тэргүүлж байна. Гэвч түүний энэ бүх хичээл зүтгэлийг нь үл хайхран Дунга түүний талаарх
бодлоо өөрчлөхгүй байгаа нь харамсалтай. Сүүлийн жил гаранд Ронниг шар өмсгөлтэйгөөр фэнүүд нь харсангүй. ДАШТ эхлэхээс өмнө Дунга бодлоо өөрчилж шидэт Роналдиног Африк руу явч яваасай л гэж залбирч байхаас. ДАШТ бол манай гаригийн хамгийн шилдэг хөлбөмбөгчид цугладаг их, хөлбөмбөгийн их баяр цэнгэл наадам. Гэтэл наадмын гол хөгжөөгч ”шидтэн”-гүйгээр бидний наадам яаж өрнөх билээ.