Бага, дунд орлоготой иргэдийн орон сууцны хангамжийг нэмэгдүүлэх, орон сууцны үнийн зохистой тогтолцоог бүрдүүлэх чиглэлээр Улаанбаатар хот Барилгын ассоциацтай хамтран ажиллах боллоо. Өчигдөр нийслэлийн Засаг дарга бөгөөд Улаанбаатар хотын Захирагч Г.Мөнхбаяр, Монголын барилгын ассоциацийн ерөнхийлөгч О.Чулуунбат нар гарын үсэг зурсан байна. Талууд юуны өмнө нийслэлийн ерөнхий төлөвлөгөөг хэрэгжүүлэх хууль эрх зүйн орчныг боловсронгуй болгох талаар хэд хэдэн хуулийг шинээр боловсруулж батлуулах, байгаль экологийн тэнцвэртэй байдлыг хангах, барилгын материалын чанар аюулгүй байдлыг хангах талаар холбогдох хуулиудад нэмэлт, өөрчлөлт оруулахаар төлөвлөсөн.

Мөн барилга барих зөвшөөрөл олгохоос барилга угсралтын ажил эхлэх хүртэлх үйл ажиллагааг нэг цэгийн үйлчилгээнд оруулахыг ЗТБХБЯ, ЭБЭХЯ-тай хамтран хэрэгжүүлэх аж. Түүнчлэн дэд бүтэц бүхий газарт шинээр барих орон сууцны барилгын 50 хувь нь бага дунд орлоготой иргэдийн худалдан авах чадавхид нийцсэн хямд өртөгтэй байхаар төлөвлөж байна. Иргэд өөрийн өмчлөлийн газраа орон сууцаар солих нөхцөлийг бүрдүүлж, эхний ээлжинд Налайх, Багахангай дүүрэгт “Барилгын материалын үйлдвэрлэлийн парк” байгуулах асуудлыг хамтран шийдвэрлэх боллоо.