
Австрийн Вена хотноо энэ сарын 13-14-ний өдрүүдэд болсон жүдо бөхийн “Дэлхийн цом”-ын тэмцээнд өрсөлдсөн Ч.Насантогтох дасгалжуулагчтэй Монголын жүдочид нэг алт, нэг мөнгөн медаль хүртсэн билээ. Тодруулбал, Австрийн татамид Бээжингийн олимпийн аварга, Монгол Улсын Хөдөлмөрийн баатар Н.Түвшинбаяр /-100/, жүдо бөхийн дэлхийн аварга, Монгол Улсын Хөдөлмөрийн баатар Х.Цагаанбаатар /73 кг/, "World Masters-2010" тэмцээний анхны аварга С.Мияарагчаа /66 кг/, Залуучуудын дэлхийн аваргын хошой мөнгөн медальт Д.Төмөрхүлэг /60 кг/, Ази тивийн аварга Г.Болдбаатар /60 кг/, залуучуудын дэлхийн аваргын хүрэл медальт Б.Тэмүүлэн /-100 кг/, О.Ууганбаатар /81 кг/ нарын манай долоон тамирчин өрсөлдсөнөөс 60 кг-ын жинд хүч үзсэн ОУХМ Д.Төмөрхүлэг аваргын алтан медалийн эзэн болсон бол 66 кг-д өрсөлдсөн ОУХМ С.Мияарагчаа мөнгөн медаль хүртсэн.
Залуучуудын ДАШТ-ий хошой мөнгөн медальт Д.Төмөрхүлэг эхний тойрогтоо гоц мөргөж, хоёрдугаар тойрогтоо Итали, дараагийн тойрогт Узбекийн бөхчүүдийг ялж, хэсгийн аваргын төлөө Австрийн алдарт жүдоч Людвик Пайщерыг ялсан байна. Харин аваргын алтан медалийн төлөөх барилдаанд манай бөх Японы жүдоч Хирофүми Ямамотог ялснаар анх удаагаа “Дэлхийн цом”-ын аварга шалгаруулах тэмцээнээс алтан медаль хүртээд байна.
Шилдэг залуу жүдоч Д.Төмөрхүлэгийн хувьд Худалдаа, үйлдвэрлэлийн дээд сургуульд сурдаг бөгөөд “Женко”, Онцгой байдлын ерөнхий газрын харьяа “Аврагч” клубт харьяалагддаг тамирчин юм. Түүний хувьд 2008 онд самбо бөхөөр өсвөр үеийн азийн болон дэлхийн аваргын алтан медалийн эзэн болж байсан бол 2008, 2009 онд дараалан жүдо бөхийн залуучуудын дэлхийн аварга шалгаруулах тэмцээнээс мөнгөн медаль хүртсэнээрээ өсөх ирээдүйтэй тамирчин болохоо харуулсан.
Ийнхүү буурал Европыг зорьсон жүдочид хоёрдугаар сарын 6-7-ны өдрүүдэд болсон Парисын “Их дуулга”-д амжилттай оролцож, С.Мияарагчаа мөнгө, Х.Цагаанбаатар хүрэл медаль хүртсэн бол хоёр дахь тэмцээн болох Австрийн “Дэлхийн цом”-оос нэг алт /Д.Төмөрхүлг/, нэг мөнгөн медаль /С.Мияарагчаа/ хүртсэн амжилтаар хөнгөн жингийнхэн одтой “тулалдаж” байна. Хөдөлмөрийн баатар Х.Цагаанбаатарын хувьд Австрийн “Дэлхийн цом”-д жин өгсч, 73 кг-д өрсөлдөн, эхний тойрогтоо Румыны бөхийг ялсан ч хоёрдугаар тойрогтоо Японы жүдочид Рики Накаяад ялагдсанаар тэмцээнийг дуусгажээ.
Шинэ мэдээлэл хүргэхэд, өнөөдөр жүдо бөхийн шигшээ багийн тамирчин Д.Нямхүү, С.Ням-Очир, П.Лхамдэгд, М.Уранцэцэг нар Герман улсыг зорилоо. Манай бөхчүүд багийнхантайгаа нэгдэн, энэ сарын 20-21-нд болох “Дэлхийн цом”-д өрсөлдөх бөгөөд үүний дараа эрчүүд хоёрдугаар сарын 27-28-ны өдрүүдэд Чехийн Прага хотод болох “Дэлхийн цом”-д хүч үзэх бол П.Лхамдэгд, М.Уранцэцэг хоёр энэ өдрүүдэд Варшавт болох бүсгүйчүүдийн “тулаан”-нд өрсөлдөх юм.
Б.Баясах
bayr hurgie