Монголд бизнес нь хичнээн сайхан санаа байгаад үйлчилгээн дээрээ очихоороо бүгд л паг. Хичнээн царайлаг цэвэрхэн худалдагч бүсгүй тохилог орчинд үйлчлээд цаанаа л нэг сэтгэлд хүртэл үйлчлэхгүй юм. Наад зах нь хүний өөдөөс харж инээмсэглэнэ гэж байхгүй.

Зурагтаар хачин чамин реклам явна. За энийг чинь л очиж авахгүй бол амьд яваад яахав гэмээр л тэнгэрт тултал магтаж үгийн сайхнаар булна. Рекламын дагуу яваад очихоор голдуу уйдсан нэг худалдагч үл тоомсорлосон байдалтай угтана. Нөгөө нэг рекламнаас төрсөн өндөр сэтгэгдэл юу ч үгүй болж бараа ч нэг их сүр жавхлантай харагдахаа болино. Голдуу л асууж шалгааж байж хэдэн үг хэлүүлэхээс гадна тухайн барааныхаа талаар биднээс нэг их дутахааргүй мэдлэгтэй байх нь элбэг.

Хэн нэгэн нь надад Монголчуудын цусанд тийм юм алга гэж хэлсэн юм. Үгүй гэтэл Монголчууд бид чинь нөгөө найрсаг сайхан зочломтгой зангаараа алдартай сан биш бил үү? Энэ нь бидний цусанд ийм mentality байхгүйдээ биш бидний орчин ийм соёлыг дэмжихгүйдээ байгаагаас тэр болов уу. Үйлчилгээний өндөр соёлыг манай бизнесийнхэн дэмжиж өөр өөрсдийн бизнестээ хөгжүүлснээр энэ mentality хүмүүсийн сэтгэлгээнд бий болгож өгөх хэрэгтэй.
Нэгэн хүн Америк даяар судалгаа хийж хаана хамгийн сайн үйлчилгээ байгааг судалжээ. Тэрээр Disneyland-д очиж нэг залуу хүү газраар хөглөрөх хогыг түүхийн хажуугаар хүмүүст замыг нь найрсагаар зааж өгч байгааг харж гэнэ. Тэгээд судлаач нөгөө хүүд дөхөж очоод түүнийг Диснейландад ажиллахад хэр сэтгэл хангалуун байгааг асуужээ. Залуу хүү тэгсэн “Тааламжтай байлгүй яахав. Харин таньд гэж хэлэхэд би Диснейландэд ажилладаггүй. Харин таны төлөө ажилладаг” гэж хариулжээ. Энэ нь түүний урьд нь ярилцаж байсан ярилцлагуудаас хамгийн мундаг хариулт болсон байна. Тэр залуу хүү үйлчилгээ гэдэг зүйлийг үнэхээр сайн ойлгожээ.

Миний туршлага дээрээс харахад энэ залуу хүү өөрөө энэ бүхнийг ухааран бусдын төлөө үйлчилж байгаа бус цаад корпораци нь ажилчдадаа хэр сайн бэлтгэж чадсаныг харуулж байгаа юм. Диснейланд бол үйлчилгээ талаасаа агуу, бусад том том бизнесүүд ч тэднээс суралцах гэж тэмүүлдэг билээ. Тэдний ажилдаа тавих mentality нь ч энэ бүхнийг илтгэдэг. “Бидний ажлын байр бол театрын тайз юм. Бид ажилчид биш, театрт тоглох жүжигчид” гэж тэд бодож сэтгэдэг.
Тиймээс бизнес эрхлэгч залуучууддаа зөвлөхөд бизнесээ эхэлчихээд санаа амрах биш, үйлчлүүлэгчиддээ хүрч үйлчлэх үйлчилгээндээ маш их анхаарал тавиарай. Энд л таны бизнесийн амжилттай байх үгүй нь шийдэгдэнэ шүү.


Танд баярлалаа.