УИХ-ын Нийгмийн бодлого, боловсрол, соёл, шинжлэх ухааны байнгын хороо өчигдөр үдээс өмнө хуралдаж Монгол Улсын эдийн засаг, нийгмийг 2010 онд хөгжүүлэх үндсэн чиглэл батлах тухай Улсын Их Хурлын тогтоолын төслийн анхны хэлэлцүүлгийг хийлээ. Эрүүл мэндийн даатгалын тогтолцоо уялдаа холбоо муутай байгаа, алслагдсан болон говийн бүсийн нэмэгдэл олгох, дээд боловсролын чанарыг сайжруулах, мэргэжлийн боловсролын төвүүдийг бэхжүүлэх, үндэсний түргэн тусламжийн сүлжээг орон нутагт байгуулж иргэдэд үйлчилгээ үзүүлэх,монгол бичгийн үндэсний хөтөлбөрийг хэрэгжүүлэх, тамирчдыг олон улсын хэмжээнд бэлтгэх, нийгмийн даатгалын тогтолцоог боловсронгуй болгох, даатгалын тусламж үйлчилгээний нэр төрөл, хамрах хүрээг оновчтой болгох зэрэг асуудлаар гишүүд Нийгмийн хамгаалал хөдөлмөрийн сайд, Эрүүл мэндийн сайд нараас асуулт асууж, тайлбар авав. Төсөл хэлэлцэх үеэр А хүрээний H1N1вирусийн халдвар газар авч олон хүн  өвчилж,  нас баралтын тоо ихэсч байгаа талаар ярилаа.

Тухайлбал,  Өмнөговь аймгийн Гурвантэс сумын засаг дарга уг өвчнөөр нас барсан тухай гишүүн Х.Бадамсүрэн мэдэгдээд, тус суманд олон хүн ханиадаар өвчилж байгаад анхаарлаа хандуулж шийдвэртэй арга хэмжээ авахгүй бол байдал хүндэрснийг анхааруулав. Байнгын хорооны дарга Д.Оюунхорол эмч нар өчигдрөөс эхлэн ажил хаялт зохион байгуулж байна. Өнөөдөр ханиадын халдвар газар авч гамшгийн байдалд хүрээд байгаа үед эмч нарын ажил хаялт зэрэгцэж байгаад Эрүүл мэндийн яам ямар арга хэмжээ авч байна вэ. Бидэнд бодит мэдээлэл хэрэгтэй байна. Шаардлагатай бол зөвхөн энэ асуудлаар байнгын хороо хуралдуулья гэсэн юм. Мөн гишүүн Ч. Улаан өвчлөл гарсны дараа бус урьдчилан сэргийлэхэд голлон анхаарч ажиллах шаардлагатай байгааг хэллээ. Эрүүл мэндийн сайд С.Ламбаа Гурвантэс суманд онцгой дэглэм тогтоож, ажлын хэсэг гаргасан бөгөөд аймгийн эмч нар очиж ажиллаж байна. Бид урьдчилан сэргийлэх арга хэмжээг шат шатанд нь авч мэдээллийн хэрэгслээр иргэдэд хандан анхааруулах арга хэмжээ авч байна.

Мөн Дэлхийн эрүүл мэндийн байгууллагаас халдвараас урьдчилан сэргийлэх вакцин ирүүлж байгааг дуулгасан юм. Гишүүн Ч.Улаан Монгол Улсын эдийн засаг, нийгмийг 2010 онд хөгжүүлэх үндсэн чиглэл батлах тухай УИХ-ын тогтоолын төсөлд тусгахаар оруулж ирсэн саналуудыг мөрөөдлийн бус бодлогын түвшинд бодит ажил хэрэг болгох нь чухал. Эдгээр жагсаалтыг Засгийн газарт буцаагаад дахин сайтар судалж бодлогоо тодорхойлоод багцалж оруулж ирүүлвэл яасан юм бэ гэсэн бол гишүүн С.Эрдэнэ төслийг Засгийн газарт буцаах боломжгүй, Эдийн засгийн байнгын хороонд шилжүүлэх нь зүйтэй гэсэн горимын саналыг тус тус гаргав. Хуралдааны төгсгөлд бүх саналын томьёоллыг нэгтгэн Эдийн засгийн байнгын хороонд шилжүүлэхээр тогтов.
Г.Ананд