-Стресс тайлах энгийн аргууд-
Уйлаад үз!
-Уйлахаасаа өмнө яг юунд бухимдаад байгаагаа, яагаад ийм байдалд орсноо, чухам хэнд гомдоод байгаагаа бод. Бодон бодон уйл. Бага зэрэг тайвшрах шиг санагдвал дахин эхнээс нь бодож, таныг гомдоосон хүнд яг өөрт нь хэлмээр санагдсан үгээ дотроо хэлээд ч уйлж болно.

Ингэсний дараа харин түүнд гомдоод буруутгаад байх шаардлага үнэхээр байсан эсэхийг өөр талаас нь бодож үзээд, бас дотроо уучилж байгаагаар төсөөлөн бодоорой.

Энэ бүхний дараа таны гомдол бухимдал ор мөргүй алга болоод, тэр хүнээ харахаар инээд чинь хүрэх болно.

Холхон очиж чанга хашгир
-Гол мөрөн, тэнгисийн эрэг дээр, эсвэл өндөр уулан дээр гарч байгаад юу ч бодохгүйгээр хэд дахин маш чангаар, уртаар хашгирч болно. Ингэхдээ сэтгэл дотроо байгаа бүхий л муу бодол санаагаа хөөн гаргаж, түүнийг нь ус агаар өөртөө уусган аваад ариусгаж цэвэрлэдэг гэдэгт итгээрэй.

Стресс тайлах өрөөнд ороод хүссэнээрээ шийтгэ!
-Байгууллага дээрээ ч юмуу хаа нэг газар стресс тайлах өрөө гарган бэлтгэж болно. Цонх хаалга нь сайн хаалттай, дуу чимээ бага цуурайтдаг байвал бүр тохиромжтой. Та хэнд уураа гаргах гэж байгаа билээ? Тэр хүнээ өмнөө зогсож байна гэж бод. Зургийг нь аваад орсон ч болно. Өмнөө байрлуулчих. Яаж шийтгэхээ бодсон биз дээ.

Тэр таныг яаж гомдоосон өөрийг нь яг тэгж шийтгэвэл илүү тохиромжтой. Тэр таныг царай муутай бүдүүн гахай гэж доромжилсон бол түүний зургийг томхон цаасан дээр тодхон зурж, түүний өөрийнх нь хамаг өө сэвийг улам тодруулан хэтрүүлэгтэйгээр зурж байгаад өөрийг нь шоолж инээн, доромжилж, бах таваа хангаж болно.
Ингээд тайвширсныхаа дараа хангалттай гэж үзвэл түүнтэй эвлэрч ч болно. Уучлалт гуйсан ч болно. Харин ул мөрөө үлдээхгүй байвал зүгээр байдаг юм.

Хэрэлд, маргалд, зөвлөлд!
-Та дотроо ганцаараа бухимдаад, тайвширч чадахгүй байгаа бол дээрх аргуудаас аль чадах аргаа сонгож авч болно. Хэрэлдэхдээ үр ашиггүй хамаг байдгаараа хашгиралдан, ухаанаа гартал уурлаж самардалцахын оронд асуудлын голыг хөндсөн, оновчтой цөөн хэдэн үгээр нөгөө хүнээ давж гарах үгийг бодож олоод, сайн бэлтгэж байгаад л урсгаж өг. Хамгийн гол нь тэр хүн чинь үгийг тань бүрэн гүйцэд сонсож байгаа эсэхийг нь анзаарах хэрэгтэй. Гүйцээ. Та давчихлаа гэсэн үг.

Хэлэлцэж зөвлөлдөх нь тайван замаар асуудлыг шийдвэрлэх хамгийн дөт арга боловч, хэлэлцэж байгаа хоёр илэн далангүй нээлттэй байж чадвал л амжилтад хүрнэ. Таны яг юу хэлэх гээд байгааг тэр хүн чинь тааж чадахгүй шүү дээ. Бухимдал үүсгэж байгаа шалтгаан, түүнээс яаж гарч болох, асуудлыг яаж шийдвэрлэж болох талаар та өөрийн санааг хэлж, хамгийн гол нь нөгөө хүн чинь таныг бүрэн зөв ойлгож, та ч бас түүнийг тэгж ойлгож байж л асуудал эцэслэн шийдэгдэнэ гэдгийг мартаж болохгүй.
Ард нь ямар нэг эргэлзээтэй, үл ойлголцсон зүйл үлдээхгүйгээр ам нээвэл уушги нээх хэрэгтэй.