Буурал суусан үсэндээ Орчлонгийн тоосыг аргадан   
Буяны нялх үрээ Тоглуулж өсгөсөн ээж минь ээ           
Боргил бага насандаа Бүүвэйн жаргал  үгүйлээд         
Буцаад ирэхийн цагтаа Баясан угтах  ээж минь ээ     

    
 Хайр гэрэлтсэн харцандаа Хорвоогийн үнэнийг тунгаан          
Хонгор жаахан үрээ Харамлан өсгөсөн ээж минь ээ   
Харгил залуу насандаа Хүндлэхийн хүслэн тээгээд    
Хүрээд ирэхийн цагтаа Хайрлан угтах ээж минь ээ      
                               
Үрчлээ суусан магнайдаа Үйлийн үнэнийг үргээн       
Үглээ бяцхан үрээ Үнэрлэж өсгөсөн ээж минь ээ         
Үлэмжийн идэр насандаа Ухаарахын учиг нэхээд       
Үймрээд ирэхийн цагтаа Үнсэн угтах ээж минь ээ       
               
Мэнэрсэн цагаан сэтгэлдээ Мөнхийн орчлонг хайлаан            
Мөндөл жаахан үрээ Энхрийлж өсгөсөн ээж минь ээ               
Мөнгөн сортой насандаа Санахын гуниг хураагаад     
Мөрөөсөөд ирэхийн цагтаа Зүүдэнд тодрох ээж минь ээ       
               
Ангир цагаан сүүндээ Бүлээн орчлонг уяраан               
Ангарай  нялх үрээ Арчлан өсгөсөн ээж минь ээ          
Аргимал зөөлөн насандаа Ачлахын зовлон амсаад    
Амьсаад ирэхийн цагтаа Зүрхэнд ивлэх ээж минь ээ

2009 USA