Олон улсын боксын холбооны /AIBA/ албан ёсны сайтад “Италийн Милан хотноо болж байгаа боксын ДАШТ-д оролцож буй Монголын баг тамирчид шүүгчдэд хахууль өгөхийг завдсан учраас цаашид тус багийн тамирчин, дасгалжуулагч, багийн эмчээс бусдыг нь тэмцээний үйл ажиллагаанд оролцохыг хориглолоо” хэмээн мэдээлсэн нь томоохон дуулиан тарив.

Миланы дэвжээнээс манайхны хэн нь, ямар орны тамирчныг хэрхэн ялсан бол гэх амжилтын дуулиан хүлээж суугаа Монголын олон хөгжөөн дэмжигчид ч багагүй гайхширч байна. ОУБХ-ны Гүйцэтгэх хороо өнгөрсөн мягмар гаригт хуралдан, Монголын багийнхантай холбоотой эл асуудлыг авч хэлэлцээд гаргасан шийдвэрийг дор хөрвүүллээ.

Монголын боксын багийн төлөөлөгчдөд
2009.09.08

Олон улсын боксын холбооны (AIBA) Гүйцэтгэх хорооноос Милан-2009 ДАШТ-д оролцож буй Монголын боксын багийн төлөөлөгчдийн гаргасан үйлдлийн талаар дараах шийдвэрийг гаргалаа.
 
Шийдвэр-1: Милан-2009 ДАШТ-ийг шүүж буй шүүгч нарын нэгийг Монголын боксчдын тоглолтыг дэмжүүлэх үүднээс хахуульдах гэж оролдсон нь ОУБХ-ны ёс зүйн дүрэм, техникийн болон тэмцээний дүрмүүдийг ноцтой зөрсөн явдал гэж үзээд Монголын боксын багийн төлөөлөгчдийн энэ үйлдлийг ОУБХ-ны Ёс зүйн хурлаар авч хэлэлцэх

Шийдвэр-2: Багийн дасгалжуулагч, эмч, тамирчдаас бусад Монголын багийн төлөөлөгчдийг Милан-2009 ДАШТ болж буй газраас гаргах, дахин нэвтрүүлэхгүй байх, түүнчлэн ДАШТ-тэй холбоотой бусад хөтөлбөрт оролцохыг нь хориглолоо.

Эл шийдвэрээс харахад юутай ч медалийн төлөө тоглолтод шалгаран үлдээд байгаа манай гурван тамирчин цааш тоглолтоо үргэлжлүүлэх бололтой. Манай боксчдын амжилт, ур чадвар сүүлийн жилүүдэд эрс сайжирч, ямар ч орны тамирчдын зүрхэнд айдас хуруулах болсон нь эл шуугиан, дуулианыг дэгдээх үндэс болсон байхыг үгүйсгэхгүй. Спортын ертөнцөд иймэрхүү атаархал өчнөөн буй. Харин эсрэгээр манайхан үнэхээр ийм эвгүй үйлдэл хийж ялалт амжилтын алдарт хүрэх гэж оролдсон бол харамсалтай төдийгүй шившигтэй явдал болно. “Нэг үхрийн эвэр доргивол мянган үхрийн эвэр…” гэдэг шиг Монголын бүхий л тамирчдын амжилт, алдар сууд сэв суун, буруу ойлголт бусдад төрөх нь дамжиггүй.

Ардын багш, гавьяат дасгалжуулагч Д.Банди манай сэтгүүлчид (утсаар) “Бүү санаа зов. Тийм явдал болоогүй ээ” гэсэн байна. Банди багшийн үгэнд итгэж, манай боксчид Миланы дэвжээн дээр өрсөлдөгч болгоноо хар хор, дуулиан шуугиантай нь “нам цохиод” аваргын алтан медальтай ирэх болтугай гэж ерөөе.