Сэтгэл санааны дарамтаас гарах 7 арга [ 2009.08.03 ]

Сэтгэл санаа өөдрөг байх эсэх нь зөвхөн таниас шалтгаална. Ямар ч хүнд нөхцөл байдалд бүү гутар. Гарах гарц байж л таарна. Харин та бухимдаад, хавь ойрынхондоо уураа гаргаад, юу ч хийхгүй гар хумхиад суувал улам л дордох болно. Өөрчлөлтийг жижиг сажиг зүйлээс эхэл.

Нэг. Алдаа, оноогоо бодитойгоор дүгнэ.
Хэн нэгэнд бурууг тохох хэрэггүй. Өөрчлөлтийг өөрөөсөө гэдэг.

Хоёр. Бичиг цаасныхаа ажлыг цэгцэл
Хэрэггүй болсон төлбөрийн чек, чихрийн цаас зэргийг цүнхнээсээ авч хая. Хувийн эмх цэгцгүй байдал таныг бүр будилуулж орхино.

Гурав. Хийж бүтээсэн, дуусгасан ажлаа жагсаалталд оруул
Дараа нь зурж хас. Ингэхэд өөртөө урам зориг орж, эрч хүч нэмэгдэх шиг болдог.

Дөрөв. Гоо сайхны салонд ор
Имиж тань шинэчлэгдэнэ.

Тав. Хувцасны шүүгээгээ цэгцэл
Хэзээ ч өмсөхгүй хувцсыг байлгах, ер нь хог новш цуглуулах нь муу энергийг бий болгодог. Хэрэггүй хувцас хунар, эд зүйлсээ ангил. Танд хэрэггүй ч бусад хэн нэгэнд хэрэгтэй байж болох юм. Тиймээс найз нөхөддөө илүүчлэхээс бүү харамс. Үнэ хүрэлцэхүйц зүйлийг хямдруулаад зарж болно. Санхүү тань арвижих эх үүсвэр болох ч юм билүү.

Зургаа. Завгүй ажил ихтэй гээд гэрээс гарахгүй байж болохгүй
Найз нөхөд, бусад хүмүүстэй уулз, асуудлынхаа тухай ярьж ч болно. Бусдын зөвлөмж хэзээд хэрэгтэй байдаг. Арван хэрэггүй зөвлөмжөөс ганц нь танд хэрэгтэй байж болох шүү дээ. Огт санаандгүй байдлаар та асуудлаас гарах мэргэн гарцыг олох ч юм бил үү. "Суусан цэцнээс, явсан тэнэг" гэдэг мэргэн үг бий.

Долоо. Шаардлагагүй бол хоол унд, нойроо хасаж болохгүй
Эрүүл мэндээс илүү үнэтэй асуудал гэж үгүй. Эцэст нь хэлэхэд, амьдралд янз бүрийн асуудал гэнэт гарч ирэх нь бий. Тэр дундаа тааламжгүй нь ч олон байж болохыг үгүйсгэхгүй. Харин энэ бүхэнд ухаалаг тэвчээртэй хандаж, зөв гарцыг эрэлхийлэх, цог хийморьтой байх нь хамгийн сайн хувилбар гэдгийг санаарай.