Голланд Улсын Роттердам хотноо болсон Дэлхийн аварга шалгаруулах жүдо бөхийн тэмцээнээс алтан медаль хүртсэн Монгол Улсын Гавъяат тамирчин, Хөдөлмөрийн баатар Х.Цагаанбаатарыг Монгол Улсын Ерөнхий сайд С.Баяр есдүгээр сарын 2-нд хүлээн авч уулзан баяр хүргэлээ.

Монголын бөхчүүд ямар хүч чадалтайг дэлхийд дахин таниулсан Х.Цагаанбаатарт Ерөнхий сайд С.Баяр Засгийн газрын нэрийн өмнөөс болон хувиасаа баяр хүргээд амжилтын буухиа цаашид ч үргэлжилнэ гэдэгт итгэлтэй байгаагаа илэрхийлэв.

Дэлхийн аварга гэсэн нэрээр Монголын түүхэнд бичигдэн үлдэж байгаа учир алхаж гишгэх, хэлж ярихаа цэгнэж  залуучууддаа үлгэр болон бөхийн дэг жаягаа сахиж явахыг Ерөнхий сайд ахмад хүний хувьд захиад Олимп, дэлхийн аваргаас алтан медаль хүртсэн Б.Түвшинбаяр, Х.Цагаанбаатар нарын араас бөхийн удамт монголын олон хүүхэд, залуус хурд, хүч, ухаанаа уралдуулахаар спортоор,  тэр дундаа жүдо бөхөөр хичээллэж байгааг онцлон тэмдэглэлээ.

Бээжингийн Олимпод манай тамирчдын гаргасан амжилт тохиолдлынх байгаагүй гэдгийг Х.Цагаанбаатар дэлхийд нотлосны зэрэгцээ хөдөлмөрлөснөөр амжилтад хүрдэг гэдгийг хүүхэд залууст ойлгуулсныг мөн дурдаад ар араасаа олон сайхан залуучуудыг үлгэрлэн дагуулж явахыг хүсэв.  

2010 оны 10 дугаар сард нийслэл Улаанбаатар хотноо болох Дэлхийн цомын аварга шалгаруулах жүдо бөхийн тэмцээний нэг жинд манай улсаас 4 тамирчин оролцоно. Олон улсын тавцанд эх орноо сурталчлах, гадаадын өндөр зэрэглэлийн тамирчдын барилдааныг эх орондоо үзэх, тэднээс суралцах, туршлага судлах энэ боломжийг алдалгүй сайн зохион байгуулахыг Ерөнхий сайд захилаа.   

Гавьяат дасгалжуулагч Ч. Насантогтох спортыг дэмжиж явдаг Ерөнхий  сайдад талархал илэрхийлээд таныг Ерөнхий сайд байх жилүүдэд Олимпийн, Дэлхийн аваргууд төрж байгааг ихэд бэлэгшээж байна гээд жудогийн өмсгөлтэй хоёр бөхийн дүрс бүхий дурсгалын зүйл гардуулав.

Гавъяат тамирчин, Хөдөлмөрийн баатар Х.Цагаанбаатарын гаргасан амжилтыг нь үнэлж Засгийн газар 30 сая төгрөгөөр урамшууллаа гэж Засгийн газрын хэвлэл, мэдээллийн албанаас мэдээллээ.