Үндэсний их баяр наадмын тухай хуулийн дагуу Их Монгол Улс байгуулагдсаны 803, ардын хувьсгалын 88 жилийн ойн баяр наадмын хүчит бөхийн барилдаанд шөвгийн 16-д шалгарсан бөх, үндэсний сурын харвааны эхний гурван байрт шалгарсан эрэгтэй, эмэгтэй харваачдаас сэргээшийн шинжилгээ авсан билээ. Нийтдээ 22 хүнээс авсан сэргээшийн шинжилгээний А сорьцын албан ёсны хариуг Солонгосын лабораториос МҮОХ-нд ирүүлсэн байна.

Солонгосын лабораториин шинжилгээний хариугаар 2360915 сорьцын дугаартай улсын заан Б.Соронзонболд, 2660840 сорьцын дугаартай улсын өсөх идэр начин Ц.Сумъяабэйс нараас сэргээш илэрсэн байна. Баяр наадмын хоёр дахь өдөр болох долдугаар сарын 12-нд дээрх 22 хүнээс тус бүрээс нь А, Б саванд 100 грамм шээс аван Солонгосын итгэмжлэгдсэн лабораторид шинжлүүлэхэд Б.Соронзонболдын A сорьцноос 30 нона милограмм, Ц.Сумъяабэйсийнхээс 2.5 нона милограмм сэргээшийн төрлийн бодис илэрчээ.

Монголын үндэсний бөхийн холбоо А сорьцын хариуг дээрх бөхчүүдэд мэдэгдсэн байна. Өчигдөр улсын начин Ц.Сумъяабэйс Б сорьцыг шинжлүүлэх хүсэлтээ МҮОХ-нд гаргасан аж. Харин улсын заан Б.Соронзонболд одоогоор ямар нэг хариу өгөөгүй гэдгийг албаны хүмүүс хэллээ. Ц.Сумъяабэйсийн Б сорьцын хариу 14-30 хоногийн дараа гарах гэнэ. Улсын заан Б.Соронзонболд улсын харцага Д.Баасандоржийг хаяж, улсын начин Ц.Сумъяабэйс улсын заан Б.Ганбатаар тав давж шөвгийн 16-д шалгарсан юм.