Тайз дэлгэцийн сайхан бүсгүйчүүдийн нэг бол  жүжигчин Г.Урнаа. Тэрбээр олон сайхан дүр амилуулж үзэгчдэдээ хүргэсэн нэгэн.

-Та “кайф” гэдэг үгийг өөрийн үгээр тайлбарлахгүй юу?
-Миний хувьд  ямар ч зүйлд санаа зовохгүй,  ажил үйлс санаснаар бүтээд, сэтгэл дүүрэн ханамжтай байх үеийг “кайф”гэж ойлгодог. Тэр хэмжээгээр тухайн хүний ажил үйлс бүтэмжтэй, сэтгэл санаа  өөдрөг байдаг юм.
-Хүн олон зүйлээс кайф авдаг. Та юунаас хамгийн ихээр кайф авдаг вэ?


-Харсан юм бүхэн сэтгэлд хүрч таалагдахад хамгийн ихээр кайф авдаг. Тухайлбал дэлгүүрт явж байхад нэг цүнх таалагдах юм бол би шууд ямар ч үнэтэй байсан хамаагүй худалдаж авна.  Бас цаг хугацаа шаардаж гараас гарсан уран бүтээлийнхээ ард гарах бүр ч сайхан байдаг. Ер нь сайхан  уран бүтээл бүхэн хүнд баяр баяслыг авчирч байдаг.  Энэ утгаар орчин тойрноосоо кайф авч кайфтай амьдрах сайхан шүү дээ. Түүнчлэн хийсэн уран бүтээл үзэгчдэд хүрээд тэд баяр хүргэхэд ч кайф авдаг. Ер нь би хийсэн уран бүтээл бүхэндээ сэтгэл хангалуун байхыг хүсдэг.
-Өнөөдөр хаа сайгүй энерги гэж ярих болсон. Та ч бас энэ сэдвээр ярих дуртай байх гэж бодож байна.
- Миний хувьд энергийг байгальтай холбож ярих дуртай.  Нарнаас их энерги авч байна.  Бас цэцэг ургамал гээд байгалийн юм бүхнээс энерги авах боломжтой.  Онгон дагшин газрын юм бүхэн сэтгэл сэргээж,  түүгээр бид тэтгэгдэж тэжээгдэж байгаа шүү дээ.  Бас энергиэрээ далласан сайхан энергитэй хүмүүстэй ажил хэргийн шугамаар уулзах дуртай.
- Уран бүтээлчид амжилт, шагнал дунд умбаж байдаг хүмүүс. Таны хувьд ямар шагнал авчихаад магнай хагартал баярлаж байсан бол?
-Би шагналыг  ялгалгүй бүгдэд нь  урамшдаг.  Тэр энэ гэхээс илүүтэй хийсэн  хөдөлмөрөө үнэлүүлж байна гэдэгт гол утга учир нь оршиж байгаа.  Хамгийн сүүлд энэ жил шилдэг эмэгтэй жүжигчний  шагнал авсан.  Ер нь зүрх сэтгэлээс гарсан бүхэн цаашид уран бүтээл хийх урам зоргийг төрүүлдэг гэж би хувьдаа боддог.
-Амьдралын дурсамжтай мөчөөсөө хуваалцахгүй юу?
-Нөхөртэйгээ анх танилцаж байсан үе их дурсамжтай санагддаг. Тэр тусмаа хүний нутагт танилцаж байсан болохоор бүр ч халуун дулаан  байдаг билээ.   Манай нөхөр их мэдрэмжтэй,   үргэлж надад сюрприз барьдаг.  Алиа хошин зангаараа ч  дандаа баясгаж байдаг.  Эндээс би  амьдралын маш их эрч хүчийг авдаг.  Би нөхөртэйгээ хамтарч дөрвөн кино хийсэн.
-Таны нөхрийг их халамжтай гэж сонссон?
-Тийм шүү.  Намайг ямар ч үед хайр халамжаар дутааж үзээгүй ханьдаа баярладаг. Дээр нь хоёулаа уран бүтээлч болохоор бие биедээ их дэмтэй байдаг юм.
-Таныг олон залуу эргүүлдэг байсан гэдэг. Харин тэдний дундаас Жаргалсайханыг насны ханиараа сонгосон. Түүний юу нь таны сэтгэлийг тэгтлээ татсан бэ?
-Арван жилийн сурагч байхад хөвгүүд их захиа өгдөг байлаа.  Дараа нь оюутан болоход үеийн залуучууд их сонирхож танилцъя гэдэг байсан. Тэр дундаас Жагааг сонгосон.  Зөв хүнээ сонгож өдий зэрэгтээ аз жаргалтай амьдарч явна.  Заяаны хань зам дээр гэдэг үнэн юм билээ.  Бид бие биенээ зөв олж таньсан.
-Уран бүтээлийнхээ ачаалал, алжаалыг хэрхэн тайлж амарч байна вэ?
- Тэрэлжид нөхөр хүүхдүүдийнхээ хамт амарч байна.  Их зугаатай хөгжилтэй амарч байгаа.  Удахгүй  театрын  намар цагийн нээлт гээд ажил ундарч ирэх учраас сайхан амралт зайлшгүй хэрэгтэй болдог.
-Ажиглаад байхад та урлагийн хүн гэхэд будаг шунх нэг их хэрэглээд байдаггүй.  Шаардлагагүй гэж үздэг үү?
-Би наснаасаа их орой будаж эхэлсэн.  Амьдрал дээр нэг  их будаад байдаггүй ч тайзан дээр яах аргагүй будах шаардлага гардаг юм.  Тийм учраас би мэдэгдэхүйц хөнгөхөн  энгэсэг түрхдэг.  Харин гэртээ байхдаа  тэжээлийн тос хэрэглэдэг.
-Таны эрхэмлэн дээдэлдэг зүйл?
-Би юуны түрүүнд гэр бүлээ эрхэмлэн дээдэлдэг. Гэр бүл бат бэх, хэрүүл тэмцэлгүй байх шиг аз жаргал үгүй.  Манай гэр бүлийн хувьд хэрүүл бараг гардаггүй гэж хэлж болно. Гэр бүлийн гишүүдийн хэн нь ч бай аливаа асуудалд тайван  хүлээцтэй хандах хэрэгтэй.
-Эмэгтэйчүүдийн  гоёл хязгааргүй шүү дээ. Та юугаар илүү гоёх дуртай вэ?
-Тийм ээ. Энэ хорвоогийн эмэгтэй хүн бүрийн явсан газар чимэгтэй, бас орчин тойронд өнгө орж байдаг.  Миний хувьд моод дагаж өөртөө зохиогүй хувцас өмсөх дургүй.  Тийм учраас нэг их үнэтэй биш  хэрнээ дэгжин хувцас сонгож авдаг.  Мөн гутал хамгийн чухал. Дээд талаараа хичнээн гоё хувцаслачихаад гутал муухай бол сүргүй харагддаг.
-Та их даруу төрхтэй харагддаг?
-Би угийн илүү хэв маяг ааш авирт дургүй.  Бүх хүнтэй нэгэн жигд харьцахыг боддог. Ихэмсэг байлаа гээд юу хожих юм бэ. Ер нь хүн өөрөөсөө илүү бусдыг хүндэтгэж сурах хэрэгтэй.