Үндэсний аюулгүй байдлын зөвлөлийн өчигдрийн хуралдаанаар Оюутолгойн хөрөнгө оруулалтын гэрээг байгуулах нь зүйтэй гэж үзсэний зэрэгцээ Засгийн газраас УИХ-ын даргад өргөн мэдүүлэх гэж буй ээлжит бус чуулганыг зарлан хуралдуулах саналыг дэмжсэн байна. Энэ тухай мэдээллийг дөнгөж сая Сангийн сайд С.Баярцогт, Эрдэс баялаг, эрчим хүчний сайд Д.Зоригт нар сэтгүүлчдэд өглөө.

Засгийн газраас байгуулагдсан ажлын хэсгийн гурван сайд энэ удаагийн хэлэлцээрээр “Айвенхоу майнз Монголиа инк” компанитай байгуулах Оюутолгойн хөрөнгө оруулалтын гэрээнд нааштай өөрчлөлтүүдийг оруулж чадсан байна. Тухайлбал, төрийн эзэмшлийн 34 хувийг үнэгүй эзэмшихээр болсон төдийгүй хөрөнгө оруулагчдад татварын болон бусад хөнгөлөлт чөлөөлөлтийг эдлүүлэхгүй байх тохиролцоонд хүрчээ. Мөн төслийн анхны хөрөнгө оруулалт таван тэрбум байсныг дөрвөн тэрбумаар тогтоожээ.

Энгийн хувьцааны санхүүжилт буюу 1,7 тэрбум төгрөгийн санхүүжилтийг 34 хувиар авна гэж байсныг хязгаарласан. Ингэхдээ 60 хувиас хэтрүүлэхгүй гэж... Үүний үр дүнд  Засгийн газарт ногдож байгаа оруулах хөрөнгийн хэмжээ 816 сая төгрөг болж хоёр дахин буурсан.  Өөрөөр хэлбэл, Засгийн газрын хүлээх эрсдлийг хоёр дахин бууруулж чадсан гэсэн үг гэдгийг Сангийн сайд онцоллоо.

Хэлэлцээрийн санхүүжилт нь өмнөх гэрээгээр гурван жилийн хугацаанд Монголын талын оролцоог хязгаарласан байсан. Дахин хэлэлцээрийн үр дүнд Монголын тал анхнаас нь өөрийнхөө талд ногдох санхүүжилтийг босгох бүрэн эрх нээлттэй. Хэрвээ Монголын тал өөрөө босгож чадахгүйд хүрвэл хөрөнгө оруулагчдаас тусламж авах боломжтой юм байна. Энэ тухай дэлгэрэнгүй мэдээллийг бид тун удахгүй хүргэх болно. Дашрамд сануулахад,  Засгийн газрын тэргүүн маргааш УИХ-ын даргад ээлжит бус чуулганыг зарлан хуралдуулах саналаа өргөн барихаар болжээ.

Г.Нар