Японы мэргэжлийн сумо бөхийн Нагоя башё өндөрлөж, их аварга Хакухо Даваажаргал түрүүллээ. Энэ өдөр Асашёорюү Хакухог давж, Котоошю Харумафүжиг давсан тохиолдолд нэмэлт барилдаан гарах байсан.  Гэвч ёкозүно Хакухо нутгийн ах, их аварга Асашёорюү Дагвадоржийг шитатэнагэ мэхээр давснаар 14 даваатай болж, энэ жилийн дөрөв дэх түрүүгээ авч, эзэн хааны цомыг 11 дэх удаагаа гардан авав. Харин Болгарын аварга биет озэки Котоошю энэ өдөр озэки Харумафүжиг ёрикири мэхээр давж, 13 даваа, хоёр унаатай башёг өндөрлөлөө. Харумафүжи есөн даваа, зургаан унаатай болов.

Нутгийн дэвжээндээ барилдаж буй озэки Котомицүки озэки Кайог дохёгоос түлхэн гаргаж 12 дахь даваагаа авлаа. Озэки Чиётайкай сэкивакэ Какурюү Анандыг давснаар башёгийн сүүлчийн өдөр арай гэж тавиас дээш хувийн амжилтаа үзүүлж чадлаа.  Какурюү таван даваа, арван унаатай болсноор ирэх башёд сэкивакэ цолоо хураалгаж, чансаа нэлээд буурна.

Энэ башёд амжилттай барилдаж 11 даваа авсан уран барилдаант Аминишики тав дахь удаагаа техниктэй бөхийн гиношё шагнал хүртэв.  Мусашигава дэвжээний бөх Шотэнро Нямсүрэн мөн адилхан 11 даваа авч, дайчин барилдааны буюу кантошё шагналыг анх удаа авлаа. Харин шёкүншо буюу ёкозүно болон озэкиг уран барилдаанаар давсан маэгашира цолтонд олгодог шагналыг энэ удаа хэнд  ч өгсөнгүй.

Манай бөхчүүдээс Асасэкирюү Дашням, Токитэнкү Хүчитбаатар нар адилхан есөн даваа, зургаан унаатай башёг өндөрлөж, ирэх башёд чансаа өгсөж барилдана.  Харин Кёкүтэнхо Цэвэгням, Моконами Базарсад, Тамаваши Мөнх-Оргил нар тавин хувийн амжилтаа үзүүлж чадсангүй ирэх башёд чансаа буурч барилдахаар боллоо.

Жюүрёод Ваканосато 14 даваатай түрүүлж ирэх башёд дээд зиндаандаа эргэн ирэхээр болж байна. Манай бөхчүүдээс Токусэгава Ганболд л найм давж, тавиас дээш хувийн амжилт үзүүлжээ.