Мотоциклийн бартаат замын 2009 оны Ази тивийн аварга шалгаруулах II шатны “Tiscot –Cup Mongolia-2009” уралдаан энэ сарын 18-ны өдөр Морин даваанд эхэлж, өчигдөр шилдгүүдээ тодрууллаа. Азийн аварга шалгаруулах тэмцээн нь жилд дөрвөн цувралаар зохиогддог бөгөөд энэ жилийн I шатны уралдаан нь Филлипинд болоход ОУХМ Б.Халиунболд хүрэл медаль хүртсэн юм. Манай улсад анх удаа зохиогдсон II шатны уралдааныг  Монголын автомашин, мотоциклийн спортын холбооныхон хагас жилийн өмнөөс зохион байгуулж, бэлтгэл ажлыг хийж эхэлсэн юм. Уралдаанд арван орны 50 гаруй шилдэг тамирчин 85 куб.см, 125 куб.см, чөлөөт гэсэн гурван ангилалд өрсөлдсөн. Уралдааны ерөнхий шүүгчээр ОУХМ Д.Очирсүх ажиллалаа. Уралдааны эхний өдөр бороо орсноос уралдааны замд бага хэмжээний бэрхшээл гарсныг эс тооцвол өөр ямар нэгэн хүндрэлтэй зүйл гараагүйг оролцогчид хэлсэн юм. Уралдаанд Ази тивийн аварга, ОУХМ Э.Халиунболд, Х.Тэмүүлэн, Б.Ган-Од нарын шилдэг тамирчид 125 куб.см болон чөлөөт ангилалд харин 85 куб.см-ийн ангилалд 12-14 насны залуу тамирчид эх орноо төлөөлөн оролцлоо.

Манайхаас медаль авах боломжтой гэж үзэж итгэл хүлээлгэж байсан ОУХМ Э.Халиунболд уралдааны замд онхолдон, зүүн гараа хугалж уралдааныг орхисон юм. Түүний уралдсан 125 куб.см-ийн ангилалд Тайландын тамирчин тэргүүлсэн бол Орос, Ираны тамирчид удаалав. Харин 85 куб.см-ийн ангилалд Филлипиний тамирчин түрүүлж алтан медаль хүртэж, манай залуу тамирчид болох Х.Эрхэмбаяр, Х.Ариунбат нар удаах байруудыг эзлэв.

Чөлөөт ангиллын алтан медалийг ОХУ-ын тамирчин Евгений Голушка, мөнгөн медалийг мөн ОХУ-ын Николай Грушников, хүрэл медалийг ОУХМ Б.Ган-Од хүртлээ.

“Уралдааны явцад ямар нэгэн будлиантай зүйл гарсангүй. Зохион байгуулагчдын зүгээс өндөр хариуцлагатай байж, тамирчдын аюулгүй байдал, техник хэрэгсэлд ихэд анхаарав. Цаашид танай улсад өндөр зэрэглэлийн уралдаан, тэмцээн зохион байгуулж болох боломжтой юм” гэж уралдааны дараа Азийн мотоциклийн спортын холбооны ерөнхийлөгч Стефан Карапелет дүгнэсэн байна. Зочин баг, тамирчдыг “Автайсан”-ы өргөөнд хүлээн авч, үндэсний урлагийн тоглолт сонирхуулж, оролцогчдод ивээн тэтгэгчдийн шагналыг гардуулж өгсөн юм. III шатны уралдаан Филлипинд есдүгээр сард, IV шатны уралдаан арван нэгдүгээр ард Арабад тус тус зохиогдох юм байна.