эмэгтэйчүүдийн  52, 57 кг-ын жингийн барилдаан болж, манай дөрвөн тамирчин өрсөлдсөнөөс эрэгтэйчүүдийн 73 кг-ын жинд зодоглосон С.Ням-Очир хүрэл медалийн эзэн боллоо. Манай тамирчин эхний тойрогтоо ӨАБНУ-ын тамирчин Зил Гидеоныг ялж, хоёрдугаар тойргийн барилдаанд Белгийн бөх Боттлеау Жоачимд ялагдсан бөгөөд дагах барилдаанд Казахстаны бөх Алкей Асселбек, Францын бөх Бланк Арнауд, Алжирын бөх Глини Еларби нарыг ялж, хүрэл медалийн төлөө өрсөлдөх боломжтой болсон юм. Ингээд хүрэл медалийн төлөөх шийдвэрлэх барилдаанд С.Ням-Очир ХБНГУ-ын тамирчин Кристофер Бенедиктийг ялснаар Дэлхийн оюутны спортын 25 дугаар их наадмаас хүрэл медаль хүртлээ.

Энэ өдрийн барилдаанд манай багийн гол найдвар болсон жүдо бөхийн ОУХМ М.Бундмаа /57 кг/, С.Мияарагчаа /66 кг/ нар зодоглосон ч М.Бундмаа эхний тойрогтоо Сербийн Рогич Иованод, С.Мияарагчаа БНСУ-ын бөх Чо Жун Ход ялагдсанаар “Универсиад”-ын дэвжээг орхилоо. Манай бөх С.Мияарагчаа Өмнөд Солонгосын бөхтэй хийсэн барилдаанд хэн хэн нь оноо авалгүй үндсэн цаг дуусгасан бөгөөд нэмэлт цагт ч мөн хоёр бөх оноо авалгүй тэнцэж, шүүгчдийн саналаар Өмнөд Солонгосын бөхөд ялалт өгсөн. Түүнчлэн эмэгтэйчүүдийн  52 kг-д өрсөлдсөн Б.Бат-Эрдэнийн хувьд эхний тойрогтоо Японы Кагаяа Чинод ялагдлаа. Ийнхүү энэ удаагийн наадамд өрсөлдөж буй Монголын оюутны спортын холбооны баг тамирчид одоогийн байдлаар нэг мөнгө, нэг хүрэл медаль хүртээд байна. Өнөөдөр /VII.10/  жүдо бөхийн тэмцээн эрэгтэйчүүдийн 60 кг болон үнэмлэхүй, эмэгтэйчүүдийн 48 кг болон үнэмлэхүй жингийн барилдаанаар үргэлжилнэ.

Белградын дэвжээнээс 20 жилийн дараа мөнгө, хүрэл медаль хүртлээ

Сербийн нийслэл Белград хотоос Монголын жүдочид дэлхийн аварга шалгаруулах тэмцээний мөнгө, хүрэл медаль авчирч байсан түүхтэй. 1999 оны жүдо бөхийн дэлхийн аварга шалгаруулах тэмцээн Белград хотноо болоход Монгол Улсын ардын багш, гавьяат тамирчин О.Балжинням мөнгө, гавьяат тамирчин Д.Баттулга хүрэл медаль хүртэж байсан бол 20 жилийн дараа Белградын татамид монголчууд дахин мөнгө, хүрэл медальтан төрүүллээ.

Жүдочид Х.Баттулга сайдад талархал илэрхийлэв

Белградын дэвжээнээс нэг мөнгө, нэг хүрэл медаль хүртээд байгаа манай жүдо бөхийн баг тамирчид Монголын жүдо бөхийн холбооны ерөнхийлөгч Х.Баттулгад хэвлэл, мэдээллийн хэрэгслээр дамжуулан талархал илэрхийлэхийг хүслээ. Учир нь энэ удаагийн наадамд жүдо бөхийн баг тамирчдыг оролцуулахад УИХ, Засгийн газрын гишүүн, Монголын жүдо бөхийн холбооны ерөнхийлөгч Х.Баттулга дэмжлэг туслалцаа үзүүлж, жүдо бөхийн багийн бүх гишүүдийн зардлын асуудлыг шийдэж өгсөн юм.

П.Лхамдэгд, С.Ням-Очир хоёр маань энэ наадмын медальтан болсноор Монголын жүдочид дэлхийн бага олимп гэгддэг нэр хүндтэй их наадмын зургаан медальтай боллоо. Манай жүдочид 1995 онд Японы Фукуока хотноо болсон „Универсиад“ их наадамд анх оролцож байсан бол Х.Болдбаатар 1999 онд алт, ОУХМ М. Бундмаа 2007 онд алт, гавьяат тамирчин Х.Эрдэнэт-Од 1999 онд хүрэл, гавьяат тамирчин Х.Цагаанбаатар 2003 онд хүрэл медалийг „Универсиад“-ын дэвжээнээс эх орондоо авчирч байсан түүхтэй.

Оюутны спортын холбоо медалийн эздийг урамшуулав

Монголын шигшээ багийг “Универсиад-2009” их наадамд амжилттай оролцуулж буй Монголын оюутны спортын холбооны удирдлагууд Белградын татамид медаль хүртсэн тамирчдаа газар дээр нь шагнаж урамшууллаа. Тодруулбал, тус холбооны ерөнхий нарийн бичгийн дарга, Монголын багийн ахлагч Д.Жаргалсайхан жүдо бөхийн эмэгтэйчүүдийн 70 кг-ын жинд мөнгөн медаль хүртсэн П.Лхамдэгд, эрэгтэйчүүдийн 73 кг-д хүрэл медалийн эзэн болсон С.Ням-Очир болон дасгалжуулагч Ч.Насантогтох нарыг мөнгөн шагналаар урамшуулж, амжилтыг нь мялаалаа.

Монголын оюутны холбоо П.Лхамдэгдийг сургалтын төлбөрөөр шагналаа

Сербийн Белград хотноо болж буй “Универсиад-2009” 25 дугаар их наадамд оролцож буй Монголын багийн бүрэлдэхүүнд Монголын оюутны холбооны дэд ерөнхийлөгч Х.Батсайхан багтаж байгаа билээ. Х.Батсайхан тэмцээний үеэр жүдо бөхийн шигшээ багийнханд туслан ажиллаж байна. Тэрбээр тэмцээний үеэр их наадмаас медаль хүртсэн эхний тамирчны нэг жилийн сургалтын төлбөрийг нь даахаар тамирчдад амласан юм. Энэхүү амлалтаа биелүүлж, жүдо бөхийн эмэгтэйчүүдийн 70 кг-ын жинд мөнгөн медаль хүртсэн П.Лхамдэгдийн их, дээд сургуулийн нэг жилийн сургалтын төлбөрийг нь хариуцахаар боллоо.

Белградын монголчууд тамирчдаа дэмжлээ

Сербийн нийслэл Белград хотод ажиллаж амьдарч байгаа Монголын арав орчим иргэн байдаг ажээ. Тэд манай баг тамирчдыг дэмжин, халуун дулаанаар хүлээж авлаа. Гарын хоолоороо дайлан, волейболын багийн тоглолт болон жүдочдын тэмцээнийг өдөр өнжилгүй үзэж сонирхож байгаа монгол ах дүүс маань Белградад биднийг маш сайн хөгжөөн дэмжиж байна. Ами, Оогий эгч нартаа багийн бүрэлдэхүүний өмнөөс талархал илэрхийлж байна. Тэд манай тамирчдад орчуулга хийх, газарчлах, хоол, цайгаар дайлах гээд сайхан сэтгэлээ харамгүй зориулж байгаа юм.

Монголын баг Белградад наадмаа тэмдэглэнэ

Долдугаар сарын 1-нд нээлтээ хийсэн Универсиад их наадмын хаалтын ажиллагаа энэ сарын 12-нд болно. Монголын баг тамирчид хаалтын ажиллагаанд оролцсоныхоо маргааш буюу 13-ны үдээс өмнө Белградаас ниснэ. Энд байх хугацаанд монголчуудын үндэсний их баяр наадам тохиож байгаа учир “Универсиад”-д оролцож байгаа манай тамирчид долдугаар сарын 12-ны өдөр наадмаа тэмдэглэхээр боллоо. Их наадмын зохион байгуулах хорооны зүгээс монголчуудын үндэсний баярыг хүндэтгэн, баяр тэмдэглэх нөхцөл бололцоог хангаж өгөхөөр болсны дагуу Белградын “Ада” үндэсний амралтын хүрээлэнд манай тамирчид наадамлах нь. Наадамд Б.Сугаржаргал, Г.Түвшинжаргал нарын үндэсний бөхийн аймгийн цолтой жүдочид маань зодоглох болно.